अमेरिकामा चालकविहीन सवारीले नियम उल्लङ्घन गरे कम्पनीलाई कारबाही हुने
प्रकाशित मिति : १९ बैशाख २०८३, शनिबार
तस्बिर : लिसा लोभा /अनस्प्ल्यास
अमेरिकामा चालकविहीन सवारीसाधनले सवारी नियम उल्लङ्घन गरे कारबाही हुने भएको छ। क्यालिफोर्नियाका केही सहरहरूमा चालकविहीन सवारीसाधनहरूको प्रयोग बढ्दै गएकाले आगामी जुलाई १ देखि यो नयाँ नियम लागू गर्न लागिएको हो।
नयाँ व्यवस्थाअनुसार स्वचालित सवारीले सवारी नियम उल्लङ्घन गरेमा सम्बन्धित कम्पनीलाई जरिवाना वा अन्य कारबाही गर्न सकिने प्रावधान राखिएको छ। कम्पनीहरूले प्रहरी वा आपत्कालीन सेवाबाट आएको कलको ३० सेकेन्डभित्र प्रतिक्रिया दिनुपर्नेछ। यदि सवारी आपत्कालीन क्षेत्रमा प्रवेश गरेमा थप दण्डको व्यवस्था पनि गरिएको छ।
राज्यको सवारी व्यवस्थापन विभागले स्वचालित सवारीसम्बन्धी नयाँ नियमहरू घोषणा गरेपछि यस्ता गाडीहरूले यातायात नियम उल्लङ्घन गर्दा प्रहरीलाई कारबाही गर्न सहज हुने भएको हो। यी नियमअनुसार अब प्रहरीले सिधै सवारी निर्माण गर्ने कम्पनीलाई “सवारी नियम पालना नगरेको सूचना” जारी गर्न सक्नेछ।
सवारी व्यवस्थापन विभागका निर्देशकका अनुसार क्यालिफोर्निया स्वचालित सवारी प्रविधिको विकास र प्रयोगमा अग्रणी रहेको छ।
यी नयाँ नियमहरूले सार्वजनिक सुरक्षाप्रतिको प्रतिबद्धता देखाउँछन्। हाल केही कम्पनीहरूले पूर्ण रूपमा चालकविहीन ट्याक्सी सेवा सञ्चालन गरिरहेका छन् भने अन्य कम्पनीहरूले विभिन्न सहरहरूमा परीक्षण अनुमति पाएका छन्।
यसअघि चालक नभएका कारण प्रहरीलाई नियम उल्लङ्घन गर्ने सवारीमाथि कारबाही गर्न समस्या परेको थियो। साथै, विद्युत् कटौतीका बेला धेरै स्वचालित गाडीहरू सडकको बीचमै रोकिँदा यातायात समेत अवरुद्ध हुँदै आएको थियो।