लुइसियाना गोलीकाण्ड: आफ्नै ७ छोराछोरीको हत्या गर्ने व्यक्ति पूर्व सैनिक भएको पुष्टि
प्रकाशित मिति : ७ बैशाख २०८३, सोमबार
फोटो: एपी/रासस
अमेरिकामा आफ्नै ७ सन्तानसहित ८ जनाको हत्या गर्ने व्यक्ति नेशनल गार्डका पूर्व सदस्य रहेको खुलासा भएको छ।
लुइसियानामा आइतबार भएको बीभत्स गोलीकाण्डमा आठ बालबालिकाको ज्यान गएको घटनाबारे अनुसन्धान भइरहँदा यो तथ्य बाहिर आएको हो।
आक्रमणकारी शमार एल्किन्सले सन् २०१३ देखि २०२० सम्म नेशनल गार्डमा सेवा गरेका थिए। यद्यपि, उनी कहिल्यै युद्धमा भने खटिएका थिएनन्। उनले साधारण सैनिकको रूपमा सेवा छाडेका थिए।
ती पूर्व नेशनल गार्ड सदस्यले यसअघि पनि अवैध रूपमा हतियार प्रयोग गरेको आरोपमा सजाय पाइसकेको खुलेको छ। आपराधिक रेकर्ड हुँदाहुँदै उनले कसरी बन्दुक प्राप्त गरे भन्ने विषयमा अधिकारीहरूले अनुसन्धान गरिरहेका छन्।
एल्किन्सले केही समयदेखि स्थानीय पूर्वसैनिक स्वास्थ्य केन्द्रमा मानसिक स्वास्थ्य सम्बन्धी उपचार गराइरहेको उनका आफन्तले बताएका छन्।
प्रहरीका अनुसार, उक्त घटनामा प्रयोग गरिएको ‘असाल्ट स्टाइल’ (आक्रमण शैली) को पेस्तोल उनले कसरी प्राप्त गरे भन्नेबारे संघीय निकायले छानबिन गरिरहेको छ। एल्किन्सलाई सन् २०१९ मा अवैध हतियार राखेको अभियोगमा दोषी ठहर गरिएको थियो, जसका कारण उनलाई कानुनी रूपमा बन्दुक राख्न निषेध गरिएको हुनसक्ने प्रहरीको अनुमान छ।
घटनाको प्रकृति हेर्दा एल्किन्सले अधिकांश बालबालिकालाई टाउकोमा गोली हानेका थिए। उनीहरू सुतिरहेको अवस्थामा गोली प्रहार गरिएको हुनसक्ने प्रहरीले जनाएको छ।
ज्यान गुमाउने आठमध्ये सात जना उनका आफ्नै सन्तान र एक जना आफन्तको बच्चा रहेको बताइएको छ। एल्किन्सले आफ्नी श्रीमती र अर्की एक महिलालाई समेत गोली हानी गम्भीर घाइते बनाएका छन्।
घटनापछि फरार भएका एल्किन्स नजिकैको एक घर अगाडि मृत फेला परेका थिए। उनले आत्महत्या गरेका हुन् वा प्रहरीको गोलीबाट मारिएका हुन् भन्ने विषय अझै स्पष्ट भइसकेको छैन।
प्रहरी प्रमुखका अनुसार प्रारम्भिक अनुसन्धानले यो घटना घरेलु विवादका कारण उत्पन्न भएको देखाएको छ। यस गोलीकाण्डले सहरभरि शोक र त्रास फैलाएको छ। स्थानीय मेयरले यसलाई सहरकै इतिहासमा सबैभन्दा दुःखद घटनामध्ये एक भनेका छन्।
सरकारी अधिकारीहरूले घरेलु हिंसालाई गम्भीर रूपमा लिन र पीडितहरूको सुरक्षाका लागि आवाज उठाउन अपिल गरेका छन्। मृत्यु हुने बालबालिकाहरू ३ देखि ११ वर्ष उमेर समूहका रहेका छन्।