अमेरिका र इजरायलका जहाजबाहेक अरूलाई हर्मुज जलमार्गमा नरोकिएको इरानको दाबी
प्रकाशित मिति : १० चैत्र २०८२, मंगलबार
इरानले अमेरिका र इजरायलसँग सम्बन्धित जहाजबाहेक अन्य कुनै पनि मुलुकका जहाजलाई हर्मुज जलमार्ग मा नरोकिएको दाबी गरेको छ।
संयुक्त राष्ट्रसंघका लागि इरानी नियोगले जारी गरेको सन्देशअनुसार, शत्रु राष्ट्रका जहाजबाहेक अन्य कुनै पनि देशका जहाजलाई आवतजावतमा अवरोध गरिएको छैन। अमेरिका र इजरायलले मिलेर आक्रमण गरेपछि इरानले ती देशहरूलाई ‘शत्रु राष्ट्र’ घोषणा गरेको हो।
इरानले शत्रु देशबाहेक अन्य जहाजलाई आवागमनको अनुमति दिइने बताएको छ। तर, त्यसका लागि ती जहाजहरूले “सम्बन्धित इरानी अधिकारीहरूसँग समन्वय“ गर्नुपर्ने सर्त इरानले राखेको छ।
यो सन्देशले पछिल्ला केही दिनयता विकसित भइरहेको परिस्थितिलाई औपचारिक रूप दिएको छ। अहिले विभिन्न देश वा ढुवानी कम्पनीहरूले आफ्ना जहाजलाई सुरक्षित रूपमा पार गराउन इरानसँग गोप्य रूपमा समन्वय गरिरहेका छन्।
इरानी नियोगले सामाजिक सञ्जाल ‘एक्स’ मार्फत भनेको छ— “जुन जहाजहरू इरानविरुद्धको आक्रमणमा सहभागी हुँदैनन् वा त्यसलाई समर्थन गर्दैनन् र घोषित सुरक्षा नियमहरू पूर्ण रूपमा पालना गर्छन्, तिनीहरूले सहज आवागमनको सुविधा पाउनेछन्।”
यस महिनाको सुरुवातदेखि नै चीन, भारत र पाकिस्तानका जहाजहरू सफलतापूर्वक उक्त जलमार्ग भएर पार भइसकेका छन्। ओमान नजिकका दुई साँघुरा मार्ग प्रयोग गर्नुको सट्टा, जहाजहरूले अहिले लरक टापु को उत्तरतर्फ, इरानी समुद्री क्षेत्र हुँदै नयाँ मार्ग प्रयोग गर्न थालेका छन्। यसले इरानलाई जहाजहरूको निगरानी र नियन्त्रण गर्न सहज बनाएको छ।
यसैबीच, इजरायली सुरक्षा फौज ले इरानले इजरायलतर्फ क्षेप्यास्त्र प्रहार गरेको पुष्टि गरेको छ। सम्भावित खतरालाई रोक्न रक्षात्मक प्रणाली सक्रिय गरिएको जानकारी दिँदै इजरायली सेनाले आफ्ना नागरिकहरूलाई मोबाइल फोनमा प्राप्त हुने चेतावनी र निर्देशनहरू पालना गर्न आग्रह गरेको छ।