अमेरिकी-बेलायती संयुक्त सैन्य अड्डामा इरानद्वारा क्षेप्यास्त्र प्रहार
प्रकाशित मिति : ७ चैत्र २०८२, शनिबार
फोटो: एएफपी/रासस
इरानले अमेरिकी–बेलायती संयुक्त सैन्य अड्डामा आक्रमण गरेको छ। हिन्द महासागरमा अवस्थित डिएगो गार्सियातर्फ दुईवटा मध्यम दूरीका ब्यालिस्टिक क्षेप्यास्त्र प्रहार गरिएको इरानले जनाएको छ। यद्यपि, इरानले प्रहार गरेका दुवै क्षेप्यास्त्र लक्ष्यमा लाग्न नसकेको विभिन्न सञ्चार माध्यमहरूले उल्लेख गरेका छन्।
इरानदेखि डिएगो गार्सियासम्मको दूरी करिब ३,८०० किलोमिटर रहेको छ। तर, इरानका पूर्व सर्वोच्च नेताले देशका क्षेप्यास्त्रहरूको अधिकतम दूरी २,००० किलोमिटरभन्दा बढी नहुने नीति तय गरेका थिए।
यस विषयमा अमेरिका र बेलायतका रक्षा मन्त्रालयले हालसम्म कुनै विस्तृत विवरण दिएका छैनन्। पेन्टागनले “हालका लागि उपलब्ध गराउने कुनै जानकारी छैन” भन्दै टिप्पणी गर्न अस्वीकार गरेको छ।
अर्कातर्फ, इजरायली सेनाले लेबनानको राजधानी बेरुतमा हिजबुल्लाहका लक्षित स्थानहरूमा आक्रमण गरेको जनाएको छ। लेबनानी सञ्चारमाध्यमहरूका अनुसार इजरायली सैन्य विमानहरूले दुईवटा हवाई आक्रमण गरेका छन्। हालसम्म कुनै मानवीय क्षतिको विवरण भने सार्वजनिक भएको छैन।
यी आक्रमणहरू इजरायली सेनाले बेरुतको दक्षिणी उपनगर ‘दहियह’ क्षेत्रका सातवटा बस्ती खाली गर्न आदेश दिएको केही समयपछि भएका हुन्। उक्त क्षेत्र हिजबुल्लाहको प्रमुख आधार मानिन्छ।
यसैबीच, लेबनानको दक्षिणी भागमा पनि इजरायली आक्रमण जारी रहेको छ। यो द्वन्द्व सुरु भएयता लेबनानभर एक हजारभन्दा बढी मानिसको ज्यान गइसकेको छ भने १० लाखभन्दा बढी मानिस विस्थापित भएका छन्। उता, हिजबुल्लाहले भने इजरायलको उत्तरी सहर रोस पिना नजिक रहेको फिलोन सैन्य अड्डातर्फ रकेट प्रहार गरेको दाबी गरेको छ।