अमेरिकी खुद्रा कम्पनी ‘टार्गेट’ले ५०० कर्मचारी हटाउने
प्रकाशित मिति : २६ माघ २०८२, सोमबार
अमेरिकी खुद्रा कम्पनी टार्गेटले करिब ५०० रोजगारी कटौती गर्ने भएको छ। अमेरिकाभर रहेका आफ्ना क्षेत्रीय कार्यालय र वितरण केन्द्रहरूबाट करिब ५०० कर्मचारी हटाउने घोषणा टार्गेटले गरेको हो।
कम्पनीका कार्यकारीहरूका अनुसार, यस कदमले आर्थिक दबाबमा रहेको कम्पनीलाई केही राहत दिनेछ। आफ्ना स्टोरहरूमा थप लगानी गर्न र ग्राहकहरूलाई आकर्षित गर्न पनि यो कदमले सहयोग गर्ने अपेक्षा गरिएको छ। टार्गेटका कार्यकारीहरूले कर्मचारीहरूलाई पठाएको आन्तरिक इमेलमार्फत यो निर्णय सार्वजनिक गरेका हुन्।
कम्पनीका अनुसार, रोजगारी कटौतीसँगै भौगोलिक रूपमा स्टोर जिल्लाहरूको पुनर्संरचना गरिनेछ। यसले स्टोरहरूमा आवश्यक स्थानमा कर्मचारी सङ्ख्या र काम गर्ने घण्टा बढाउन मद्दत गर्नेछ।
यो निर्णय नयाँ प्रमुख कार्यकारी अधिकृत माइकल फिडेल्केले लिएका पहिलो रणनीतिक निर्णयहरूमध्ये एक हो। उनलाई गत वर्ष नेतृत्व सुम्पिएको थियो। कम्पनीले चार वर्षभन्दा बढी समयदेखि स्थिर रहँदै आएको बिक्री सुधार्ने प्रयास गरिरहेको छ।
यी रोजगारी कटौती र पुनर्संरचनाले गत अक्टोबरदेखि सुरु भएको कर्मचारी कटौतीको प्रक्रियालाई थप बल दिएको छ। अघिल्लो चरणमा टार्गेटले १,८०० कर्पोरेट रोजगारी कटौती गरेको थियो, जुन कम्पनीको विश्वव्यापी कर्पोरेट जनशक्तिको करिब ८ प्रतिशत थियो। त्यो पछिल्ला १० वर्षयताकै सबैभन्दा ठूलो कटौती थियो।
टार्गेटले अमेरिकाभर रहेका आफ्ना करिब २,००० स्टोरहरूमा कर्मचारी सुदृढीकरणतर्फ लगानी केन्द्रित गर्ने प्रयास जारी राखेको स्पष्ट पारेको छ। यद्यपि, टार्गेटका प्रवक्ताले स्टोरहरूमा हुने योजनाबद्ध लगानीबारे थप प्रतिक्रिया दिन अस्वीकार गरेका छन्।
टार्गेट ऐतिहासिक रूपमा सस्तो कपडा, किफायती किराना सामान, घरेलु सामग्री, इलेक्ट्रोनिक्स र खेलौनाका लागि परिचित छ। तर, पछिल्ला वर्षहरूमा कम्पनीले विभिन्न चुनौतीहरूको सामना गरिरहेको छ।
पछिल्ला साताहरूमा टार्गेटको गृहनगर मिनियापोलिसमा आप्रवासन प्रवर्तन सम्बन्धी विषयमा कम्पनीले लिएको भूमिकाले थप विवाद सिर्जना गरेको छ। गत महिना मिनियापोलिस नजिकैको एक टार्गेट स्टोरभित्र दुई जना कर्मचारी पक्राउ परेपछि कम्पनी विवादमा तानिएको थियो।