न्युयोर्क गभर्नरमा रिपब्लिकन उम्मेदवार ब्लेकम्यानलाई ट्रम्पको समर्थन
प्रकाशित मिति : ६ पुस २०८२, आइतबार
अमेरिकी राष्ट्रपति डोनाल्ड ट्रम्पले न्युयोर्क राज्यको गभर्नर पदका लागि नासाउ काउन्टीका रिपब्लिकन कार्यकारी ब्रुस ब्लेकम्यानलाई समर्थन गर्ने घोषणा गरेका छन्।
ट्रम्पकी लामो समयदेखिकी सहयोगी सांसद एलिस स्टेफानिकले गभर्नरको दौडबाट बाहिरिने निर्णय गरेको भोलिपल्टै यो घोषणा आएको हो। न्युयोर्क राज्यको गभर्नरका लागि आगामी शरद ऋतुमा निर्वाचन हुँदैछ।
ट्रम्पको यो समर्थनलाई राजनीतिक वृत्तमा अपेक्षित मानिएको छ। यसले लङ आइल्याण्डको उपनगरीय नासाउ काउन्टीका प्रमुख ब्लेकम्यानलाई रिपब्लिकन पार्टीको आन्तरिक प्राथमिक चुनावमा सहजता प्रदान गर्नेछ। साथै, यसले उनलाई डेमोक्र्याटिक पार्टीकी वर्तमान गभर्नर क्याथी होकुलसँगको प्रतिस्पर्धाका लागि बलियो आधार तयार गरिदिने सम्भावना देखिएको छ।
सांसद एलिस स्टेफानिकले शुक्रबार आफूले गभर्नरको दौड स्थगित गरेको र कंग्रेसमा पुनः उम्मेदवारी नदिने घोषणा गरेकी थिइन्। स्टेफानिक र ब्लेकम्यानबीचको आन्तरिक प्रतिस्पर्धा कडा हुने अनुमान गरिएको थियो। तर, स्टेफानिकले “अनावश्यक र लामो रिपब्लिकन प्राथमिक चुनाव” टार्नका लागि आफू पछि हटेको स्पष्ट पारेकी छिन्।
स्मरण रहोस् ट्रम्पले स्टेफानिकलाई संयुक्त राष्ट्रसंघका लागि अमेरिकी राजदूतको रूपमा मनोनयन गरेका थिए। तर, प्रतिनिधि सभामा रिपब्लिकन पार्टीको बहुमत कमजोर हुन सक्ने चिन्ताका कारण पछि उक्त मनोनयन फिर्ता लिइएको थियो।
नासाउ काउन्टीका प्रमुख ब्लेकम्यान आफ्ना केही विवादास्पद नीतिका कारण चर्चामा छन् । उनले ट्रान्सजेन्डर खेलाडीहरूलाई काउन्टीका खेलकुद सुविधाहरू प्रयोग गर्न प्रतिबन्ध लगाउने नीति ल्याएका छन्।
उनले एक स्वयंसेवी कानुन कार्यान्वयन इकाइ गठन गरेका छन्, जसलाई आलोचकहरूले ‘मिलिसिया’ (अर्धसैनिक समूह) को संज्ञा दिएका छन्। उनले ट्रम्पको आप्रवासन नीति अनुरूप संघीय अधिकारीहरूसँग सहकार्य गर्न काउन्टीका जासुसहरूलाई निर्देशन दिएका छन्।
वर्तमान गभर्नर क्याथी होकुलको चुनावी अभियानले ट्रम्पको समर्थनलाई न्युयोर्कका मतदाताहरूले नकारात्मक रूपमा लिने टिप्पणी गरेको छ।