क्यालिफोर्नियाको नयाँ नक्सा विरुद्ध ट्रम्प प्रशासनद्वारा मुद्दा दायर

भवानी प्रसाद पाण्डे

---

प्रकाशित मिति : कार्तिक २७, २०८२ बिहीबार

फोटो : पल हानाओका / अन्स्प्ल्यास

क्यालिफोर्नियामा जनमत संग्रहबाट पारित भएको निर्वाचन क्षेत्रको पुनः नक्साङ्कनका विरुद्ध अमेरिकी न्याय मन्त्रालयले मुद्दा दायर गरेको छ।

अमेरिकी न्याय मन्त्रालयले क्यालिफोर्नियामा भर्खरै जनमतसंग्रहमार्फत पारित भएको नयाँ कांग्रेसको नक्सा विरुद्ध मुद्दा दायर गरेको हो।

नयाँ नक्साले डेमोक्र्याटहरूलाई फाइदा पुग्ने र टेक्सासमा रिपब्लिकनहरूले हालै गरेको नक्सा पुनःनिर्माणबाट पाएको लाभलाई सन्तुलन गर्ने उद्देश्य राखेको बताइन्छ।

अटर्नी जनरल पाम बोन्डीले क्यालिफोर्नियाका गभर्नर ग्याभिन न्युसेममाथि “सत्ता कब्जा” गरेको आरोप लगाउँदै नयाँ नक्सा जातीय गेरिम्यान्डरिङमा आधारित रहेको दाबी गरिन्।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

प्रस्ताव ५० लाई मतदाताहरूले भारी बहुमतले पारित गरेका थिए, जसले डेमोक्र्याटहरूलाई पाँच नयाँ जिल्लामा प्रत्यक्ष लाभ पुर्‍याएको छ। न्युसेमका प्रवक्ताले प्रतिक्रिया दिँदै भने, “पराजितहरू मतपेटिकामा हारे, र चाँडै अदालतमा पनि हार्नेछन्।”

बोन्डीले न्युसेमले “क्यालिफोर्नियालीहरूलाई चुप गराउने” र “एकदलीय शासन” कायम राख्ने प्रयास गरिरहेको आरोप लगाइन्।

उनको आरोप छ कि न्युसेमले आफ्नो राज्यलाई सुरक्षित राख्न र एन्टिफाको हिंसा रोक्न ध्यान दिनु पर्नेमा सत्ता दुरुपयोगमा लागेका छन्।

दायर गरिएको मुद्दामा सङ्घीय अभियोजकहरूले गभर्नर न्युसेम र सेक्रेटरी अफ स्टेट शिर्ली वेबरमाथि “जातीय आधारमा विभाजित निर्वाचन क्षेत्र” निर्माण गरेको आरोप लगाएका छन्।

अभियोजकको दाबी छ कि यो कार्य संविधानको १४औँ संशोधनको समान अधिकार क्लजको उल्लङ्घन हो।

अमेरिकामा राजनीतिक लाभका लागि गेरिम्यान्डरिङ वैधानिक भए पनि जातीय आधारमा गेरिम्यान्डरिङ गर्नु संविधानविरुद्ध मानिन्छ।

न्याय मन्त्रालयले नयाँ नक्सा बनाउँदा ल्याटिनो जनसांख्यिकीलाई अत्यधिक प्राथमिकता दिएको “ठोस प्रमाण” रहेको बताएको छ।

नक्सा परिवर्तनको यो अभियान सन् २०२६ को मध्यावधि चुनाव प्रभावित पार्ने लक्ष्यसहित राष्ट्रपति डोनाल्ड ट्रम्पद्वारा सुरु गरिएको राष्ट्रिय अभियानको हिस्साका रूपमा चलाइएको हो। यसले अमेरिकी प्रतिनिधिसभामा रिपब्लिकनको बहुमत सुनिश्चित गर्न सकिन्छ भन्नेमा ट्रम्पको विश्वास रहेको छ।

क्यालिफोर्नियाका गभर्नर न्युसेमले टेक्सासमा ट्रम्पको दबाबमा हुँदै गएको नक्सा परिवर्तनको जवाफस्वरूप “आगोको जवाफ आगोले” (Fire with Fire) भन्ने रणनीतिमा अगस्टमा अभियान थालेका थिए।

क्यालिफोर्नियाका अटर्नी जनरल रोब बोन्ताले गभर्नरको कदम र प्रस्ताव ५० को बचाउ गर्दै यसविरुद्ध आएका कुनै पनि कानुनी चुनौती सफल नहुने बताएका छन्। क्यालिफोर्निया रिपब्लिकन पार्टीले पनि गत हप्तामै प्रस्ताव ५० विरुद्ध मुद्दा दायर गरिसकेको छ।