रिपब्लिकनहरूले ओबामाकेयरलाई कमजोर पार्ने प्रयास गरिरहेको डेमोक्र्याटको आरोप
प्रकाशित मिति : कार्तिक २६, २०८२ बुधबार
अमेरिकामा जनताको स्वास्थ्य बीमामा सरकारको खर्च पुनः व्यवस्थित गर्ने नयाँ प्रस्ताव अघि सारिएको छ ।
रिपब्लिकन नेताहरूले बीमा कम्पनीलाई सिधा रकम दिने प्रचलन रोक्नुपर्ने बताएका हुन् । त्यसको सट्टा उक्त रकम अमेरिकी उपभोक्ताहरूलाई सिधै खातामा पठाउनुपर्नेमा उनीहरूको जोड रहेको छ ।
यदि पैसा उपभोक्ताकै खातामा पठाइयो भने उनीहरूले आफ्नो मनपर्ने बीमा योजना रोज्न सक्ने रिपब्लिकनहरूको धारणा रहेको छ । तर अर्थशास्त्रीहरूले यो कदमले “ओबामाकेयर” लाई कमजोर पार्ने वा प्रतिस्थापन गर्ने प्रयास हुन सक्ने सम्भावना रहेको बताएका छन् ।
उनीहरूका अनुसार रिपब्लिकनहरूले विगतमा पनि पटक–पटक ओबामाकेयर कार्यक्रमलाई असफल बनाउन खोजेका थिए । रिपब्लिकनहरूको योजनाअनुसार सङ्घीय सरकारले बीमा कम्पनीलाई दिने सब्सिडी रोक्नेछ । सो रकम नागरिकका व्यक्तिगत खातामा जम्मा गरिनेछ ।
यी खाता प्रणालीद्वारा नागरिकहरूले औषधि, उपचार, सह–भुक्तानी जस्ता खर्चमा सीधै पैसा प्रयोग गर्न सक्नेछन्।
राष्ट्रपति डोनाल्ड ट्रम्पले सामाजिक सञ्जालमा बीमा कम्पनीहरूले खाइरहेको सयौँ अर्ब डलरको रकम जनतालाई पठाउनुपर्छ भनेर लेखेका छन् ।
तर डेमोक्र्याट नेताहरू भने यो योजनासँग सहमत नभएको बताएका छन् । उनीहरूले अहिलेको उपाय भनेको केवल सब्सिडी एक वर्षका लागि विस्तार गर्नु हो भनेर बताएका छन् ।
सरकार पुनः सञ्चालन गर्न भएको द्विदलीय सम्झौताअनुसार डिसेम्बरमा सिनेटमा सब्सिडी विस्तारबारे मतदान हुने वाचा गरिएको छ ।
यी कर छुटहरूले सन् २०२१ देखि अमेरिकामा स्वास्थ्य बीमा सदस्यता ऐतिहासिक स्तरमा बढाएको छ ।
अर्थशास्त्री टिम लेटनका अनुसार, यदि सब्सिडीलाई नगदमा रूपान्तरण गरियो भने बीमा बजारमा सहभागीको सङ्ख्या घट्ने र धेरै बीमा कम्पनीहरू बजारबाटै बाहिरिने सम्भावना उच्च रहेको छ ।
धेरै डेमोक्र्याटहरूले रिपब्लिकनहरूको यो प्रस्ताव ओबामाकेयर कमजोर पार्ने अर्को प्रयास मात्र भन्नेमा दृढ देखिएका छन् ।