अमेरिकालाई बेलायतले तस्करीका सूचना दिन रोक्यो, दुई देशको सम्बन्धमा कस्तो असर पर्ला ?

भवानी प्रसाद पाण्डे

---

प्रकाशित मिति : कार्तिक २५, २०८२ मंगलबार

बेलायतले अमेरिकालाई मादक पदार्थ तस्करीबारेका सूचना उपलब्ध गराउन रोकेको छ ।  बेलायतले अमेरिकी सैन्य कारबाहीलाई अवैध मानेपछि क्यारेबियनमा मादक पदार्थ तस्करीबारे सूचना साझेदारी गर्न रोकेको हो । 

अमेरिकासँग नजिकको सुरक्षा साझेदार बेलायतले अब क्यारेबियन क्षेत्रमा मादक पदार्थ तस्करीमा संलग्न डुंगाबारेको गोप्य जानकारी साझा नगर्ने भएको हो । 

बेलायती अधिकारीहरूले अमेरिकी सैन्य आक्रमणलाई अवैध ठानेका छन् । अमेरिकाले सञ्चालन गरेका ती कारबाहीमा संलग्न हुन नचाहेका कारण यस्तो निर्णय गरिएको बेलायती अधिकारीले बताएका हुन । 

दुई देशबीचको लामो समयदेखिको घनिष्ठ सुरक्षा सहयोगमा यो कदमले ठूलो दरार उत्पन्न गराएको देखिन्छ ।  अमेरिकाले गत सेप्टेम्बरदेखि क्यारेबियन सागरमा मादक पदार्थ बोक्ने आशंका गरिएका डुंगाहरूमा हवाई आक्रमण गर्दै आएको छ ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

ती हमलाहरूमा अहिलेसम्म ७६ जनाको मृत्यु भएको अन्तर्राष्ट्रिय सञ्चारमाध्यमहरूले जनाएका छन् । अमेरिकाले बेलायतबाट प्राप्त सूचना प्रयोग गरी लक्ष्य निर्धारण गर्न सक्ने आशंकाले बेलायतले एक महिनादेखि सूचना साझेदारी रोकेको बताएको छ । 

संयुक्त राष्ट्रसंघका मानवअधिकार प्रमुख फोल्कर टर्कले गत महिना मै ती हमलाहरू “अन्तर्राष्ट्रिय कानुनविपरीत र गैरन्यायिक हत्या” भएको बताएका थिए । 

ट्रम्प प्रशासनले मादक पदार्थ तस्करहरू “अमेरिकाविरुद्धको सशस्त्र द्वन्द्वका शत्रु लडाकु” हुन् भन्दै तिनीहरूलाई मार्न मिल्ने दाबी गरेको छ । 

तर कानुनी विज्ञहरूले सो व्याख्यालाई अस्वीकार गर्दै यस्तो आक्रमण “नागरिकहरूमाथि अवैध घात” भएको बताएका छन्।