ट्रम्पसँग व्यापार तनावका बीच जी ७ देशका विदेशमन्त्रीहरू क्यानडामा भेट्दै
प्रकाशित मिति : कार्तिक २५, २०८२ मंगलबार
क्यानडाकी विदेशमन्त्री अनिता आनन्दले जी ७ मा आवद्ध देशहरु र अन्य केही थप देशहरुका विदेशीमन्त्रीहरुसित सुरक्षा, आपसी सम्बन्ध र आर्थिक व्यवस्थाहरुबारे छलफल गर्दै छिन् । अमेरिका र क्यानडाजस्ता परम्परागत सहयोगीहरूबीच रक्षा खर्च, व्यापार, राष्ट्रपति डोनाल्ड ट्रम्पको गाजा युद्धविराम योजना र रुस-युक्रेन युद्ध अन्त्य गर्ने प्रयासहरूलाई लिएर तनाव बढिरहेका बेला यो बैठक भइरहेको छ ।
जी ७ राष्ट्रहरु फ्रान्स, जर्मनी, इटाली, जापान, यूके, अमेरिका तथा युरोपियन युनियनसमेतका विदेशमन्त्रीहरु यसबारेका महत्वपूर्ण एजेण्डाहरुमाथि छलफल गर्न क्यानाडामा भेला भएका छन् । जी ७ मा आवद्ध देशहरुबाहेकलाई पनि छलफलमा बोलाइएको छ । अष्ट्रेलिया, ब्राजिल, मेक्सिको, साउदी अरेबिया, दक्षिण कोरिया, युक्रेन र भारतलाई पनि आमन्त्रण गरिएको आयोजकले जानकारी दिएको छ ।
यस अघि क्यानाडामा जी ७ राष्ट्रहरुको शिखर सम्मेलन आयोजना गरिएको थियो । दुई दिनसम्म चलेको सो शीखर सम्मेलनमा शान्ति, सुरक्षा र अर्थतन्त्रको दिगोपना र आर्थिक वृद्धि लगायतका एजेण्डाहरुमाथि छलफल भएको थियो ।
जुनको १५ देखि १७ सम्म आयोजित सम्मेलनका क्रममा जी ७ मा सहभागी नेताहरुले मध्यपूर्वमा युद्ध विरामको आह्वान गरेका थिए भने अमेरिकी राष्ट्रपति डोनाल्ड ट्रमले विभिन्न देशमाथि आयातमा लगाउँदै आएका करको दर बढाएको विषयमा समेत चर्चा भएको थियो ।
क्यानाडाले गर्ने आयातहरुमा भारी मात्रामा कर लगाएपछि अमेरिका र क्यानाडाबीचको सम्बन्ध पनि चिसिँदै गएको सन्दर्भमा आयोजित यो बैठक यिनै करका सन्दर्भमा पनि केन्द्रीत हुने अनुमान विश्लेषकहरुको छ । रक्षा खर्चका सन्दर्भमा पनि बैठकमा छलफल हुनेछ ।
भोलि अमेरिका, कोरिया, युक्रेन, साउदी अरेबिया र इटालीसित द्विपक्षीय हित र सरोकारका सवालमा वार्ता हुने कार्यक्रम तय भएको छ । त्यस्तै सुरक्षा र उर्जा लगायतका विषयहरुमा पनि छलफलहरु हुने छन् ।
गाजामा इजरायल-हमास युद्धलाई लिएर पनि जी७ मा असहमतिहरू रहेका छन्, जसमा बेलायत, क्यानडा र फ्रान्सले द्वन्द्वको समाधान नभए पनि प्यालेस्टिनी राज्यलाई मान्यता दिने घोषणा गरेका छन्। रुस-युक्रेन युद्धमा, ट्रम्पले लिएको अडानभन्दा धेरैजसो जी७ सदस्यहरूले रुसविरुद्ध कडा अडान लिएका छन्।