अमेरिकी विमानवाहक युद्धपोत क्यारेबियन सागरमा पुगेपछि तनाव बढ्दै
प्रकाशित मिति : कार्तिक २५, २०८२ मंगलबार
फोटो: विलियम रुडोल्फ/अनस्प्ल्यास
अमेरिकी विमानवाहक युद्धपोत क्यारेबियन सागरमा पुगेपछि क्षेत्रीय तनाव बढेको छ ।
अमेरिकी नौसेनाले विश्वकै सबैभन्दा ठूलो युद्धपोत ‘यूएसएस जेराल्ड आर. फोर्ड’ केन्द्रित नौसैनिक स्ट्राइक फोर्स क्यारेबियन क्षेत्रमा पुगेको पुष्टि गरेको हो ।
गत महिना राष्ट्रपति डोनाल्ड ट्रम्पले उक्त युद्ध समूहलाई क्यारेबियन पठाउने आदेश दिएका थिए ।
मादक पदार्थ (लागूऔषध) बोकेका डुङ्गाहरू विरुद्धका आक्रमणहरू बढेको र भेनेजुएलासँग बढ्दो तनावको बीचमा यो तैनाथी देखिएपछि सो क्षेत्रमा तनाव बढेको हो ।
अमेरिकाले अहिलेसम्म क्यारिबियन र पूर्वी प्रशान्त क्षेत्रमा कम्तीमा १९ वटा डुङ्गामाथि आक्रमण गरेको छ । ती आक्रमणमा कम्तीमा ७६ जनाको मृत्यु भएको छ ।
भेनेजुएलाका राष्ट्रपति निकोलास मादुरो र अन्य अधिकारीहरूले अमेरिकामाथि “सङ्कट सिर्जना गरेको” र आफ्नो सरकारलाई “ढाल्ने प्रयास गरेको” आरोप लगाएका छन्।
ट्रम्प प्रशासन र कोलम्बियाका राष्ट्रपति गुस्ताभो पेत्रोबीचमा पनि सम्बन्धमा तनाब देखिएको छ । ट्रम्पले पेत्रोलाई “ठग र खराब व्यक्ति” भन्दै आलोचना गरेका थिए।
पेत्रोले आफ्ना सुरक्षा निकायहरूलाई अमेरिकी निकायहरूसँगको सूचनाको आदानप्रदान स्थगित गर्न आदेश दिएका छन् ।
अमेरिकी नौसेनाले स्ट्राइक समूह नोभेम्बर ११ मा अमेरिकी साउथर्न कमाण्डको जिम्मेवारी क्षेत्र (ल्याटिन अमेरिका र क्यारिबियन) भित्र प्रवेश गरेको बताएको छ ।
उक्त फोर्समा ‘यूएसएस जेराल्ड आर. फोर्ड’ विमानवाहक युद्धपोत सहित ४,००० भन्दा बढी नौसैनिक र दर्जनौँ विमान छन् । साथै, गाइडेड-मिसाइल विध्वंसक र अन्य विभिन्न युद्धपोतहरू पनि समावेश छन्।
पेन्टागनका प्रवक्ता सीन पारनेलले भने, “यो फोर्सले अवैध गतिविधि पत्ता लगाउने, निगरानी गर्ने र रोक्ने अमेरिकी क्षमतालाई सुदृढ पार्नेछ ।” मादक पदार्थ तस्करी तथा आपराधिक समूहहरूलाई विघटन गर्न सहयोग पुराउने उनको दाबी रहेको छ ।
क्यारिबियन क्षेत्रमा यसअघि नै हजारौँ अमेरिकी सैनिक, एक आणविक शक्ति सम्पन्न पनडुब्बी र प्युर्टो रिकोस्थित सैन्य विमानहरू रहेका छन् । यो दशकौँपछि ल्याटिन अमेरिकामा देखिएको सबैभन्दा ठूलो अमेरिकी सैन्य उपस्थिति हो।