दादुरामुक्त देशको सूचीबाट क्यानडा बाहिरियो, अमेरिका जोखिममा
प्रकाशित मिति : कार्तिक २४, २०८२ सोमबार
क्यानडाले दादुरा उन्मूलन भएको देशको मान्यता गुमाएको छ। प्यान अमेरिकन हेल्थ अर्गनाइजेसन ले क्यानडाले आफ्नो दादुरा उन्मूलनको स्थिति गुमाएको घोषणा गरेको हो। देशले लगातार बाह्र महिनासम्म दादुराको प्रकोप नियन्त्रण गर्न नसकेपछि यस्तो घोषणा गरिएको हो।
क्यानडालाई अब दादुरामुक्त देश मानिने छैन। जसका कारण सम्पूर्ण अमेरिकी क्षेत्रले पनि आफ्नो दादुरा उन्मूलनको मान्यता गुमाएको छ। यद्यपि, अन्य देशहरू व्यक्तिगत रूपमा अझै पनि रोगमुक्तका रूपमा मानिन्छन्।
अमेरिका पनि आगामी जनवरीसम्म जारी प्रकोपलाई नियन्त्रण गर्न नसकेमा आफ्नो स्थिति गुमाउने जोखिममा परेको छ। हाल यूटा, एरिजोना र साउथ क्यारोलाइनामा नयाँ सङ्क्रमितहरू भेटिएका छन्।
क्यानडामा प्रकोप सन् २०२४ को अक्टोबरमा सुरु भएको थियो। स्वास्थ्य अधिकारीहरूले यो स्थिति कम खोप लगाएका मानिसहरूका कारण भएको बताएका छन्।
निर्देशक डा. जरबस बारबोसाले दादुरामुक्त भएको देशको मान्यताबाट पछाडि हटेको अवस्था भए पनि पुनः प्राप्त गर्न सकिने सम्भावना रहेको बताए।
संस्थाले क्यानडाका सरकार र जनतालाई खोप अभियान तीव्र बनाउन आह्वान गरेको छ। दादुरा रोक्नका लागि जनसङ्ख्याको ९५ प्रतिशत खोपयुक्त हुनु आवश्यक रहेको छ।
क्यानडाको पब्लिक हेल्थ एजेन्सीले र अन्य क्षेत्रीय स्वास्थ्य निकायहरूसँग सहकार्य गर्दै खोपको दर सुधार र डाटा साझेदारी सुदृढ गर्ने प्रयास गरिरहेको बताएको छ।
क्यानडालाई करिब ३० वर्षदेखि दादुरामुक्त देशका रूपमा मानिएको थियो। देशले अहिले फैलिएको दादुरा स्ट्रेनलाई कम्तीमा बाह्र महिनासम्म नियन्त्रणमा राख्न सकेमा पुनः उन्मूलनको स्थिति पुनः प्राप्त गर्न सक्छ।
सन् २०२५ मा मात्र क्यानडामा ५,००० भन्दा बढी दादुरा सङ्क्रमित भेटिएका छन्, जुन सङ्ख्या अमेरिकामा रिपोर्ट भएका १ हजार ६८१ सङ्क्रमितको झन्डै तीन गुणा हो। यद्यपि, क्यानडाको जनसङ्ख्या निकै सानो छ।
प्रमुख प्रकोप कम खोप प्राप्त समुदायहरूमा केन्द्रित भएको अधिकारीहरूले जनाएका छन्। दादुरा, मम्प्स र रुबेला विरुद्धको एमएमआर खोप सबैभन्दा प्रभावकारी उपाय मानिन्छ। यो ९७ प्रतिशत प्रभावकारी हुन्छ। खोपले निमोनिया, मस्तिष्क सुन्निने र मृत्युबाट समेत जोगाउँछ।
क्यानडाकी इम्युनोलोजिस्ट प्रा. डन बोडिशका अनुसार कम खोप दरका पछाडि धेरै कारण छन्। ती कारणहरूमध्ये चिकित्सकसम्मको पहुँचको अभाव, राष्ट्रिय खोप अभिलेख नहुनु र गलत सूचनाको फैलावट प्रमुख रहेका छन्।
अमेरिकी क्षेत्र २०१६ मा दादुरामुक्त घोषित हुने पहिलो र एकमात्र विश्व क्षेत्र बनेको थियो। पछि भेनेजुएला र ब्राजिलमा पुनः प्रकोप भएपछि यो स्थिति अस्थायी रूपमा खारेज गरिएको थियो।
ती दुई देशले २०२४ मा व्यापक खोप अभियानका कारण आफ्नो स्थिति पुनः प्राप्त गरेका छन्। तर अहिले रोग पुनः उत्तर अमेरिकामा फैलिएको छ। क्यानडा र अमेरिकासँगै मेक्सिकोमा पनि सङ्क्रमितको सङ्ख्या तीव्र रूपमा बढेको छ।