एनआरएन अमेरिकाका अध्यक्ष पौडेलको नेतृत्वमा नक्कली प्रतिनिधि दर्ता
प्रकाशित मिति : आश्विन ३०, २०७४ सोमबार
फर्जी मत र ब्यापक जालसाजीबाट चुनाव जितेका एनआरएन अमेरिकाका अध्यक्ष केशव पौडेलले एनआरएन आईसीसीको चुनावमा पनि फर्जी गरेको भेटिएको छ । एनआरएनएको आठौं महाधिवेशनमा मत खसाल्ने मतदाताहरुको दर्तामा घुसपैठ गरी नक्कली प्रतिनिधि दर्ता गरेको भेटिएको अनलाइनखबरले जनाएको छ ।
पौडेलको नेतृत्वमा एनआरएन अमेरिकाले स्वीकृत गरी पठाएको अन्तिम सूचीमा नामै नभएका ६० जना प्रतिनिधि दर्ता गरेको भेटिएको जनाइएको छ । पौडेल लगायतले आईसीसी केही पदाधिकारी र सचिवालयका एक कर्मचारीलाई समेत प्रभावित पारी नक्कली प्रतिनिधिको दर्ता गरेको पुष्टि भएको छ ।
फर्जी सूची दर्ता गरेको अभियोगमा दर्ता प्रक्रियामा संलग्न एक कर्मचारीलाई निलम्बन गरिएको जनाइएको छ । शनिबार दर्तास्थलबाट एकाएक हराएका ती कर्मचारीले होटलको कोठामा गई ल्यापटपबाट नक्कली प्रतिनिधि दर्ता गरेको भेटिएको छ ।