अमेरिकाको म्युजियमबाट १ हजारभन्दा बढी बहुमूल्य वस्तु चोरी
प्रकाशित मिति : कार्तिक १५, २०८२ शनिबार
फोटो : श्रीवत्स वेङ्कटरामन / अनस्प्ल्यास
अमेरिकाको क्यालिफोर्नियामा रहेको ओकल्याण्ड म्युजियमबाट १ हजारभन्दा बढी वस्तु चोरी भएका छन्।
क्यालिफोर्निया प्रहरीले ओकल्याण्ड म्युजियम अफ क्यालिफोर्नियाको सङ्ग्रहालयबाट १,००० भन्दा बढी मूल्यवान् वस्तु चोरी भएको घटनाको अनुसन्धान सुरु गरेको बताएको छ।
चोरीमा धातुका गहना, आदिवासी टोकरी, एथलेटिक ट्रफी लगायत त्यो राज्यको इतिहास बताउने वस्तुहरू समावेश छन्।
बिहान सबेरै म्युजियमको अफ-साइट स्टोरेज (अर्थात् मुख्य भवन बाहिरको भण्डारण केन्द्र) बाट यो चोरी भएको ओकल्याण्ड प्रहरीले जानकारी दिएको हो।
म्युजियमकी निर्देशक लोरी फोगार्टीले वस्तुहरू फ्लि मार्केट, एन्टिक पसल वा पॉन शपहरूमा देखिएमा जनताले जानकारी दिन सकून् भनेर अनुसन्धानलाई सार्वजनिक गरिएको बताइन्। यो चोरीले म्युजियमलाई मात्रै नभएर समुदायलाई नै हानि पुर्याएकाले समुदायसँग मिलेर ती वस्तुहरू फिर्ता ल्याउने आशा गरिएको उनले बताइन्।
फोगार्टीका अनुसार यो योजनाबद्ध चोरी नभई अवसरवादी चोरहरूले गरेको अपराध हो।
चोरीमा परेका वस्तुहरूमा कलाकार फ्लोरेन्स रेसनिकोफका धातुका गहना, सजाइएका वालरसका दाँत, नेटिभ अमेरिकन (आदिवासी) टोकरीहरू र २०औँ शताब्दीका ऐतिहासिक स्मृतिचिह्नहरू—जस्तै चुनावी ब्याज, खेलकुद पुरस्कार आदि—समावेश रहेका छन्।
म्युजियमले क्यालिफोर्नियाको कला, इतिहास र प्राकृतिक परिवेशको दस्तावेजीकरण गर्ने काम गर्छ, जसमा १८औँ शताब्दीदेखि अहिलेसम्मका ९० हजारभन्दा बढी कला–कृतिहरू छन्।
यसले ‘ब्ल्याक पावर आन्दोलन’ र ‘विद्यार्थी आन्दोलन’ विषयमा पनि प्रदर्शनीहरू आयोजना गरेको छ।
ओकल्याण्ड प्रहरीले एफबीआईको “आर्ट क्राइम युनिट” सँग मिलेर अनुसन्धान अघि बढाइरहेको जनाएको छ। उक्त इकाइले कलात्मक चोरी, नक्कली कला, र पुरातात्त्विक सम्पत्ति तस्करीका विषयमा विशेष ध्यान दिन्छ।
सन् २०१३ जनवरीमा पनि ओकल्याण्डकै एक व्यक्तिले म्युजियममा पसेर क्यालिफोर्निया गोल्ड रश युगको गहनाको बाकस चोरी गरेका थिए। त्यो वस्तु पछि पब्लिक टिपमार्फत पॉन पसलमा फेला परेको थियो।