चिनियाँ सामानमा १०० प्रतिशत थप आयात कर लगाउने अमेरिकाको घोषणा

भवानी प्रसाद पाण्डे

---

प्रकाशित मिति : आश्विन २३, २०८२ शुक्रबार

अमेरिकी राष्ट्रपति डोनाल्ड ट्रम्पले चीनबाट आयात हुने सामानमा थप १०० प्रतिशत आयात कर लगाउने घोषणा गरेका छन्।

नयाँ शुल्क नोभेम्बर १ देखि वा त्यसअघि नै लागू हुने बताइएको छ । यो निर्णय लामो समयदेखि चलिरहेको अमेरिका–चीन व्यापार युद्धमा सबैभन्दा ठूलो वृद्धि भएको मानिएको छ ।

हाल चीनबाट आयात हुने सामानमा ३० प्रतिशत शुल्क लाग्दै आएको छ । अब चीनबाट अमेरिकामा आयात हुने सामानमा १३० प्रतिशत शुल्क लाग्ने भएको छ ।

ट्रम्पले आफनो सामाजिक सञ्जालमा लेख्दै भने, “अमेरिकाले अहिले चीनले तिरेको शुल्कबाहेक थप १०० प्रतिशत शुल्क लगाउनेछ । साथै, नोभेम्बर १ बाट हामी सबै प्रकारका महत्वपूर्ण सफ्टवेयरमा निर्यात नियन्त्रण लागू गर्नेछौं।”

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

यो कदम चीनले आफ्नो “रेयर अर्थ मेटल्स” (दुर्लभ धातु) निर्यातमा लगाएको नियन्त्रणको प्रतिक्रिया स्वरूप आएको हो ।

यी धातुहरू धेरै प्रकारका इलेक्ट्रोनिक उपकरणहरू बनाउन अत्यावश्यक हुने गर्छन् । यसै कारण ट्रम्पले यस महिनाको अन्त्यतिर दक्षिण कोरियामा तय गरिएको चिनियाँ राष्ट्रपति सी जिनपिङसँगको बैठक पनि रद्द गरेका छन्।

ट्रम्पको उक्त घोषणापछि अमेरिकी शेयर बजारमा ठूलो गिरावट आएको छ । अमेरिका र चीन विश्वका दुई सबैभन्दा ठूला अर्थतन्त्र हुन्। यद्यपि अहिले मेक्सिको अमेरिकाको प्रमुख आपूर्तिकर्ता देश बनेको छ ।

अमेरिकाले अझै पनि चीनबाट सयौं मिलियन डलर बराबरका वस्तुहरू आयात गर्छ । त्यसैगरी, चीन पनि अमेरिकी निर्यातका लागि प्रमुख बजार हो।

अमेरिका मुख्यतः इलेक्ट्रोनिक्स, लुगा र फर्निचर चीनबाट आयात गर्छ । ट्रम्पले अमेरिकी व्यवसायीहरूलाई उत्पादन अमेरिकामै फिर्ता ल्याउन दबाब दिँदै आएका छन् ।

तर पछिल्ला महिनामा भने उनले केही नरम व्यवहार देखाएका छन् । किनकि धेरै कम्पनीहरूले अमेरिकामा नयाँ लगानी र कारखाना विस्तारको घोषणा गरेका छन् ।

गत वर्ष ट्रम्प प्रशासनले चीनका सामानमा १४५ प्रतिशत सम्मको शुल्क लगाएको थियो । जसलाई धेरैले वास्तविक “व्यापार प्रतिबन्ध” सरह मानेका थिए ।

तर, त्यसपछि ट्रम्पले इलेक्ट्रोनिक वस्तुहरूलाई २० प्रतिशत शुल्कमा सीमित गर्दै केही छुट दिएका थिए। मे महिनामा अमेरिका र चीनबीच भएको सहमति अनु्सार दुवै देशले एकअर्का विरुद्ध लगाएको शुल्क घटाएका थिए ।

अमेरिकाले चीनसँगको व्यापार सम्झौतामा “दुर्लभ धातु” आपूर्तिको वृद्धि सुनिश्चित गर्न खोज्दै आएको छ । तर चीनले सम्झौता उल्लंघन गरेको भन्दै ट्रम्पले पहिले पनि अमेरिकी प्रविधि निर्यातमा प्रतिबन्ध लगाएका थिए ।

पछि चीनले पनि अमेरिकी जहाजहरूमाथि शुल्क लगाउने कदम शुक्रबारबाट लागू भएको छ।