यौन तस्करी विरुद्धको अपिल अमेरिकी सर्वोच्च अदालतद्वारा अस्वीकार, म्याक्सवेलको २० वर्षको जेल सजाय कायम

भवानी प्रसाद पाण्डे

---

प्रकाशित मिति : आश्विन १९, २०८२ सोमबार

अमेरिकी सर्वोच्च अदालतले घिसलेन म्याक्सवेलको यौन तस्करी विरुद्ध गरिएको अपिल अस्वीकार गरेको छ।

अदालतले अपिल सुन्न कारणबिना नै अस्वीकार गरेपछि बेलायती समाजसेवी म्याक्सवेलको २० वर्षको जेल सजाय यथावत् रहने भएको छ। राष्ट्रपतिले क्षमादान दिएमा भने सजायमा हेरफेर हुनेछ।

उनका वकिल डेभिड ओस्कार मार्कसले अदालतको आदेशपछि निराश भएको बताएका छन्। तर ‘न्याय सुनिश्चित गर्नका लागि कानूनी विकल्पहरू खोजिरहने’ उनले बताए।

म्याक्सवेलमाथि आफ्ना पूर्व प्रेमी जेफ्री एपस्टिनका लागि किशोरीहरूलाई फसाउने र उनीहरूलाई दुरुपयोगका लागि पठाउने आरोपमा दोषी ठहर गरिएको थियो। एपस्टिन सन् २०१९ मा जेलमै मृत फेला परेका थिए।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

एपस्टिनकी पीडित भर्जिनिया रोबर्ट्स जियुफ्रेका परिवारजनहरूले भने अदालतको निर्णयपछि खुशी व्यक्त गरेका छन्। उनीहरूले म्याक्सवेलले पूरा सजाय भोग्नुपर्ने आवश्यकता रहेको बताएका छन्।

अमेरिकी न्याय मन्त्रालयले यसबारे तत्काल कुनै टिप्पणी गरेको छैन।

म्याक्सवेललाई अमेरिकी संघीय अधिकारीहरूले एपस्टिनको यौन तस्करी सञ्जालमा उनको भूमिका र अन्य कसैको संलग्नता भएको वा नभएकोबारे अनुसन्धानका क्रममा सोधेका थिए।

सन् २०२१ मा उनी दोषी ठहरिएकी थिइन्। अभियोजन पक्षका अनुसार उनले सन् १९९४ देखि २००४ सम्मका बीचमा १४ वर्षसम्मका बालिकाहरूलाई भर्ती गरी एपस्टिनका लागि तयार पार्ने गरेको देखिएको छ।

राष्ट्रपति डोनाल्ड ट्रम्पले म्याक्सवेललाई क्षमादान दिन सक्ने सम्भावनाबारे अड्कलबाजी भइरहेको छ।

तर ह्वाइट हाउसले यसअघि नै “कुनै प्रकारको छुट वा क्षमादानबारे छलफल नभएको” भन्दै पुनः त्यही कुरा दोहोर्याएको छ। राष्ट्रपतिका प्रेस सचिव क्यारोलाइन लिभिटले सामान्यतया क्षमादानसम्बन्धी अनुरोधबारे टिप्पणी नगर्ने बताएकी थिइन्।

एपस्टिनको मुद्दासँग सम्बन्धित गोप्य फाइलहरू सार्वजनिक गर्न माग भइरहेका कारण अहिले यो मुद्दा राजनीतिक विवादको विषय पनि बनेको छ।

म्याक्सवेललाई सन् २०२५ जुलाईमा न्याय विभागका अधिकारीहरूले सोधपुछ गरेपछि टेक्सासको न्यून सुरक्षा स्तरको जेल एफपीसी ब्रायनमा सारिएको थियो।

उनले सोधपुछमा एपस्टिनसँग ट्रम्पका भेटघाटका क्रममा “कुनै अनुचित व्यवहार नदेखेको” भनेकी थिइन्।

एफपीसी ब्रायन जेल टेक्सासको राजधानी अष्टिनबाट करिब १६० किलोमिटर टाढा अवस्थित छ।