सबै बन्धकहरूलाई रिहा गर्न हमास सहमत
प्रकाशित मिति : आश्विन १६, २०८२ शुक्रबार
हमासले शुक्रबार राति एक वक्तव्य जारी गर्दै यस हप्ताको सुरुमा राष्ट्रपति ट्रम्पले प्रस्तुत गरेको शान्ति प्रस्तावको जवाफमा गाजामा बन्धक बनाएर राखिएका सबै इजरायली बन्धकहरू र मृत्यु भएकाहरूको शवहरू समेत रिहा गर्न सहमत भएको बताएको छ।
शुक्रबार राति अनलाइनमा पोस्ट गरिएको उक्त वक्तव्यमा सशस्त्र समूहले बन्धकहरूलाई “राष्ट्रपति ट्रम्पको प्रस्तावमा समावेश आदानप्रदान सूत्रअनुसार, र आदानप्रदानका लागि क्षेत्रीय अवस्था पूरा भएमा” रिहा गर्ने बताएको छ ।
समूहले थप भन्यो, “यस सन्दर्भमा, आन्दोलनले यी विवरणहरू छलफल गर्न मध्यस्थकर्ताहरू मार्फत तुरुन्तै वार्तामा प्रवेश गर्न आफ्नो तयारीको पुष्टि गर्दछ।”
वक्तव्यमा समूह “प्यालेस्टिनी राष्ट्रिय सहमति र अरब तथा इस्लामिक समर्थनमा आधारित स्वतन्त्र टेक्नोक्र्याटहरूको प्यालेस्टिनी निकायलाई गाजा पट्टीको प्रशासन हस्तान्तरण गर्न” सहमत भएको उल्लेख छ।
तर, उक्त भाषाबाट हमास भविष्यमा गाजामा राजनीतिक शक्ति प्रयोग गर्नबाट वञ्चित गरिनुपर्ने प्रस्तावको शर्तमा सहमत भएको हो वा उसले त्यो टेक्नोक्र्याट निकायभित्र आफ्ना लागि वा आफ्ना सदस्यहरूका लागि ठाउँ देखेको हो भन्ने स्पष्ट भएको छैन।
हमासको प्रतिक्रियाले इजरायल र ह्वाइट हाउस लाई सन्तुष्ट पार्छ कि पार्दैन भन्ने प्रष्ट छैन । उदाहरणका लागि, उक्त वक्तव्यले समूहलाई आफ्ना हतियारहरू त्याग्न आह्वान गर्ने अमेरिकी प्रस्तावका प्रमुख तत्वहरूलाई सम्बोधन गरेको छैन, जुन इजरायलको प्रमुख माग रहेको छ।
हमासले सह-अस्तित्वका लागि प्रतिबद्ध आफ्ना सदस्यहरूलाई आममाफी दिने प्रस्तावलाई पनि सम्बोधन गरेको छैन ।
गाजामा युद्ध अक्टोबर ७, २०२३ मा हमासको नेतृत्वमा इजरायलमा भएको आक्रमणपछि सुरु भएको थियो, जसमा करिब १,२०० मानिस मारिएका थिए र २५० भन्दा बढीलाई बन्धक बनाइएको थियो।
त्यसयता, गाजाको स्वास्थ्य मन्त्रालयका अनुसार इजरायली सैन्य कारबाहीमा नागरिक र लडाकू दुवै गरी ६०,००० भन्दा बढी प्यालेस्टिनीहरू मारिएका छन् र यस क्षेत्रको पूर्वाधार ध्वस्त भएको छ।