कृत्रिम बौद्धिकताको नाम परिवर्तन गरी सुपर इन्टेलिजेन्स राख्न साझेदार मुलुकहरूलाई अमेरिकाको आग्रह
प्रकाशित मिति : २९ आश्विन २०८३, बिहिबार
तस्बिर: जुलिया डेमारी निकिन्सन / एपी/रासस
अमेरिकाले आफ्ना अन्तर्राष्ट्रिय साझेदारहरूलाई ‘कृत्रिम बौद्धिकता’ को नाम परिवर्तन गरी ‘सुपर इन्टेलिजेन्स’ राख्न आग्रह गरेको छ। उदीयमान प्रविधिलाई यो नयाँ नामले अझ राम्रोसँग प्रतिनिधित्व गर्ने दाबी अमेरिकाको छ।
अमेरिकी अर्थ मन्त्रालयका अन्तर्राष्ट्रिय मामिला हेर्ने उपसचिव एरिन ब्राउनले यसबारे जानकारी दिएकी हुन्। ब्राउनका अनुसार, अन्तर्राष्ट्रिय मुद्रा कोषको निर्देशक समितिद्वारा तयार पारिँदै गरिएको संयुक्त घोषणापत्रमा नयाँ शब्दावली प्रयोग गर्न वासिङ्टनले आइएमएफका अन्य सेयरधनी देशहरूसँग वार्ता गरिरहेको छ।
गत महिना अमेरिकी राष्ट्रपति डोनाल्ड ट्रम्पले सरकारी निकायहरूलाई प्रविधिको सन्दर्भमा “आर्टिफिसियल इन्टेलिजेन्स” को सट्टा “सुपर इन्टेलिजेन्स” शब्द प्रयोग गर्न निर्देशन दिएका थिए।
जी-२० प्रमुख अर्थतन्त्रहरूको परिभ्रमणशील अध्यक्षसमेत रहेको अमेरिका यो परिवर्तनलाई अन्तर्राष्ट्रियस्तरमै लागू गराउन चाहन्छ।
“राष्ट्रपति ट्रम्प यस विषयमा स्पष्ट हुनुहुन्छ र उहाँ ‘एसआई’ शब्द प्रयोग गर्दै हुनुहुन्छ,” ब्राउनले भनिन्, “यो शब्दको प्रयोग अमेरिकाको स्पष्ट प्राथमिकता हो। हामीलाई लाग्छ यसले हालको प्रविधिलाई अझ उपयुक्त ढङ्गले समेट्छ।”
यदि यो नयाँ शब्द प्रयोग नगरेमा अमेरिकाले घोषणापत्रमा हस्ताक्षर नगर्ने हो कि भन्ने प्रश्नमा भने उनले कुनै टिप्पणी गर्न चाहिनन्।
“हामी अझै पनि घोषणापत्रको मस्यौदाबारे वार्ताकै क्रममा छौँ, त्यसैले म अहिल्यै कुनै निष्कर्षमा पुग्न चाहन्नँ,” उनले भनिन्।
घटनाक्रमबारे जानकार एक स्रोतका अनुसार,आइएमएफसीको बैठकका क्रममा अमेरिकी अधिकारीहरूले नयाँ भाषा प्रयोग गर्न दबाब दिएका थिए, जसले गर्दा केही सदस्य राष्ट्रहरू आश्चर्यमा परेका छन्।
यदि अमेरिकाले सर्वसम्मत घोषणापत्रमा समर्थन जनाएन भने, आइएमएफसीका वर्तमान अध्यक्ष तथा साउदी अरबका अर्थमन्त्री मोहम्मद अल-जदानले सदस्य राष्ट्रहरूको धारणा समेटिएको अध्यक्षको छुट्टै वक्तव्य जारी गर्न सक्नेछन्। अर्को विकल्पका रूपमा ‘एसआई’ वा ‘एआई’ कुनै पनि शब्द प्रयोग नगरी “नयाँ प्रविधि”मात्र उल्लेख गर्ने विषयमा पनि छलफल भइरहेको छ।
आइएमएफसीको पत्रकार सम्मेलन तथा सहमति पत्र शनिबार आइएमएफ प्रबन्ध निर्देशक क्रिस्टालिना जर्जीभा र अल-जदानको नेतृत्वमा सार्वजनिक गरिनेछ।
“हामी यस प्रविधिलाई अमेरिकी र विश्वव्यापी आर्थिक वृद्धिको प्रमुख चालकका रूपमा हेर्छौँ,” ब्राउनले थपिन्, धेरै देशहरूले एसआईको विकास, मापदण्ड निर्धारण र यसले विश्वव्यापी उत्पादकत्व कसरी बढाउन सक्छ भन्नेबारे अमेरिकाको दिशानिर्देश पर्खिरहेका छन्।