राष्ट्रपति ट्रम्पले भने : ‘गर्भावस्थामा प्यारासिटामोल सेवनले बच्चामा अटिजम हुने सम्भावना उच्च’
प्रकाशित मिति : आश्विन ५, २०८२ सोमबार
अमेरिकी राष्ट्रपति डोनाल्ड ट्रम्पले गर्भावस्थामा प्यारासिटामोल (टायलिनल)को सेवनले बच्चामा अटिजमको सम्भावना उच्च हुने बताएका छन्। उनले ओभल अफिसमा स्वास्थ्य मन्त्री रोबर्ट एफ केनेडी जुनियरसँगै बसेर यो घोषणा गरेका थिए।
उनले गर्भवती महिलाले टायलिनल अत्यधिक ज्वरो हुँदा मात्र सेवन गर्नुपर्ने र यो औषधि ‘उपयुक्त नभएको’ बताएका थिए। तर, यो दाबीको वैज्ञानिक आधार नभएको भन्दै धेरै पक्षबाट यसको खण्डन गरिएको छ। टायलिनल उत्पादन गर्ने कम्पनी केनभ्युले गर्भावस्थाका लागि यो औषधि सुरक्षित रहेको बताएको छ।
कम्पनीका अनुसार, “स्वतन्त्र र ठोस विज्ञानले एसिटामिनोफेनले अटिजम उत्पन्न गर्दैन भनेर स्पष्ट देखाएको छ। यसको विपरीत धारणा गर्भवती आमाका लागि जोखिमपूर्ण छ।”
अमेरिकन कलेज अफ ओब्स्टेट्रिसियन र गायनाकोलोजिस्टले यो घोषणा वैज्ञानिक प्रमाणले पुष्टि नभएको र अटिजमजस्ता स्नायुसम्बन्धी समस्याहरूलाई सरलीकृत गर्ने खतरनाक दाबी भएको बताएको छ।
सन् २०२४ मा स्वीडेनमा २४ लाख बालबालिकामा गरिएको एक ठूलो अध्ययनले गर्भावस्थामा एसिटामिनोफेनको सेवन र अटिजम वा अन्य मानसिक विकाससम्बन्धी रोगबीच कुनै प्रत्यक्ष सम्बन्ध नभएको निष्कर्ष निकालेको थियो।
ट्रम्पले अमेरिकामा बढ्दो अटिजमको दरलाई “भयानक संकट” भनेका छन्। यद्यपि, विशेषज्ञहरूका अनुसार अटिजमको कारण पत्ता लगाउन सजिलो छैन।
यो मुख्यतया आनुवंशिक र वातावरणीय कारणहरूको जटिल मिश्रणले हुने गर्छ। अमेरिकी रोग नियन्त्रण तथा निवारण केन्द्र (सीडीसी) का अनुसार, सन् २००० यता अटिजमको निदान दर तीव्र गतिमा बढेको छ।
सन् २०२० सम्ममा बालबालिकामा ८ वर्षसम्म अटिजमको दर २.७७५ पुगेको थियो। यसको कारण बढ्दो जनचेतना, अटिजमको परिभाषामा विस्तार र सम्भावित वातावरणीय कारकहरू भएको विशेषज्ञहरूको भनाइ छ।
रोबर्ट एफ केनेडी जुनियरले अमेरिकाको फूड एण्ड ड्रग एजेन्सी (एफडीए) ले चिकित्सकहरूलाई सचेतना सूचना पठाउने, औषधिको लेबल परिवर्तन प्रक्रिया सुरु गर्ने र सार्वजनिक स्वास्थ्य अभियान चलाउने बताएका छन्।
उनले ल्युकोभोरिन नामक भिटामिन बीको पुरानो औषधि अटिजम भएका बालबालिकामा प्रयोग गर्न एफडीए ले चाँडै सिफारिस गर्न सक्ने पनि बताएका छन्। यसले फोलेटको कमी भएका अटिजम बालबालिकामा बोल्ने क्षमतामा सुधार ल्याउन सक्छ भनी अनुसन्धान भएको एफडीए कमिश्नर मार्टी माकारीले बताएका छन्।
ट्रम्पको यो घोषणापछि, टायलिनल उत्पादन गर्ने कम्पनीको शेयर मूल्यमा गिरावट आएको थियो। प्रमुख चिकित्सकीय संस्थाहरूले हालसम्मको अनुसन्धानले कुनै नकारात्मक प्रभाव प्रमाणित नगरेको भन्दै गर्भवती महिलाका लागि टायलिनल सुरक्षित भएको बताएका छन्। एजेन्सीहरुको सहयोगमा