नेपालमा रहेका आफ्ना नागरिकलाई आवतजातव सिमित गर्न आग्रह गर्दै बेलायतद्वारा ट्राभल एड्भाइजरी जारी
बेलायतले नेपालको लागि आफ्नो ट्राभल एड्भाइजरी अपडेट गर्दै हाल नेपालमा रहेका वा यात्रा गर्ने योजनामा रहेका बेलायती नागरिकहरूले नयाँ मार्गदर्शन जाँच गर्न सुझाव दिएको छ । बेलायती नागरिकहरूलाई एड्भाइजरी अपडेट हुँदा इमेल सूचनाहरू प्राप्त गर्न साइन अप गर्न प्रोत्साहित गरिएको छ ।
नेपालमा रहेका बेलायती नागरिकहरुलाई नयाँ अपडेटहरुका लागि नियमित रूपमा बेलायती ट्राभल एड्भाइजरी जाँच गर्न सल्लाह दिइएको छ भने कन्सुलर सहायताको आवश्यकता परेका ब्रिटिश नागरिकहरूलाई दूतावासमा फोन गर्न सुझाव दिइएको छ ।
नेपालमा रहेका बेलायती नागरिकहरुलाई आवतजावत सीमित गर्न, विरोध क्षेत्रहरूबाट टाढा रहन, स्थानीय मिडिया च्यानल मार्फत अपडेट रहन, स्थानीय अधिकारीहरू र कर्फ्यू नियमका निर्देशनहरू पालना गर्न बेलायतले सुझाव दिएको छ ।
ट्राभल एड्भाइजरीमा भनिएको छ, “काठमाडौं र देशभरका अन्य ठाउँमा विरोध प्रदर्शन भइरहेका छन्। प्रहरीले घातक बल प्रयोग गर्दै हिंसात्मक झडपहरू भएका छन्। यसले गर्दा धेरैको मृत्यु र घाइते भएका छन्। काठमाडौं र पोखरा लगायत धेरै शहरहरूमा कर्फ्यू लगाइएको छ। विरोध प्रदर्शनबाट बच्नुहोस्, अपडेटहरूको लागि स्थानीय मिडिया जाँच गर्नुहोस् र अधिकारीहरूको निर्देशन पालना गर्नुहोस्।”
“काठमाडौं विमानस्थल पनि अवरुद्ध भएको छ, जसले आन्तरिक र अन्तर्राष्ट्रिय उडानहरूलाई असर गरिरहेको छ। यात्रा गर्नु अघि अद्यावधिक जानकारीको लागि आफ्नो एयरलाइन, होटल र टुर अपरेटरलाई सम्पर्क गर्नुहोस्। पर्यटकहरूले यात्रा योजनाको प्रमाणसहित विमानस्थलहरूमा घुम्न र यात्रा गर्न सक्षम हुनुपर्छ,” ट्राभल एड्भाइजरीमा भनिएको छ ।
सामाजिक सञ्जाल प्रतिबन्ध हटाइए पनि सेवाहरूमा निरन्तर अवरोधको अपेक्षा गर्नुपर्ने एड्भाइजरीमा उल्लेख छ ।
