ल्याटिन अमेरिकामा अमेरिकी सैन्य उपस्थिति बढाएकोमा चीनको आपत्ति
प्रकाशित मिति : भाद्र ७, २०८२ आईतबार
अमेरिकाले ल्याटिन अमेरिकाको वरपर ठूलो सैन्य बल तैनाथ गरेपछि चीनले आपत्ति जनाएको छ।
चिनियाँ विदेश मन्त्रालयकी प्रवक्ता माओ निङले भनिन्, “चीन कुनै पनि देशको सार्वभौमिकता र सुरक्षा उल्लङ्घन गर्ने कदमको विरोध गर्छ। हामी अन्तर्राष्ट्रिय सम्बन्धमा बल प्रयोग वा बल प्रयोगको धम्कीको विरोध गर्छौं।”
यसैबीच, ट्रम्प प्रशासनले करिब ४ हजार सैनिक, आणविक शक्तियुक्त पनडुब्बी, युद्धपोत र टोही विमानसहितको सैन्य बल पठाएको छ।
भेनेजुएलाका राष्ट्रपति निकोलस मदुरोले ४५ लाख मिलिसियालाई परिचालन गर्दै “कुनै पनि साम्राज्यले भेनेजुएलाको पवित्र भूमिमा हात लगाउन सक्दैन” भनेका छन्। उनले आफ्नो देशसँग पर्याप्त सुरक्षा क्षमता भएको र शान्ति कायम गर्न प्रतिबद्ध रहेको दाबी गरे।
चीन र भेनेजुएलाबीचको व्यापारिक सम्बन्ध चीनका लागि लाभदायक छ। सन् २०२३ मा चीनले भेनेजुएलामा करिब ३.४५ अर्ब डलरको वस्तु निर्यात गरेको थियो, जबकि उसले केवल ७३९ मिलियन डलरको आयात गरेको थियो। भेनेजुएलाको मुख्य निर्यात तेल हो।
यस कारण चीनले भेनेजुएलाको ऊर्जा स्रोतमा पहुँच कायम गर्न चाहेको बताइएको छ। यसबीच, एउटा निजी चिनियाँ कम्पनीले भेनेजुएलाका दुईवटा तेल क्षेत्रमा लगानी गर्दै २०२६ सम्ममा दैनिक ६० हजार ब्यारेल तेल उत्पादन गर्ने योजना बनाएको छ।
अमेरिकाले मदुरोलाई ‘कार्टेल अफ द सनस’ नामक आपराधिक समूहको नेता भएको दाबी गर्दै उनलाई पक्राउ गर्न सहयोग गर्ने व्यक्तिलाई ५० मिलियन डलर इनामको घोषणा गरेको छ। यो आरोप नयाँ नभई सन् २०२० देखि लगाइएको हो।
विशेषज्ञहरूका अनुसार चीनको ताजा अभिव्यक्ति ‘राजनीतिक रूपमा सही’ भए पनि भेनेजुएलाका लागि ठोस सहयोग जनाउने खालको भने छैन।
चीनले आफ्नो ऊर्जा स्वार्थ जोगाउन सन्तुलित र प्रतीकात्मक समर्थन मात्र देखाएको हो। विश्लेषकहरूले भेनेजुएलाले चीनसँगको सम्बन्धलाई आफ्नो पक्षमा प्रचार गर्ने प्रयास गरेको बताएका छन्।