टेक्सासका डेमोक्र्याट सांसदहरू फर्किए, अदालतबाट न्याय पाउने अपेक्षा
प्रकाशित मिति : भाद्र २, २०८२ मंगलबार
अमेरिकाको टेक्सासका डेमोक्र्याट सांसदहरूले आफूहरू “रिपब्लिकनहरूको योजनाभन्दा अझ खतरनाक” भएको दाबी गरेका छन्। उनीहरूले अदालतमा यो “जातिवादी नक्सा” हटाउन कानुनी आधार तयार गर्ने बताएका छन्।
रिपब्लिकनहरूको मतदान क्षेत्र पुनःनिर्धारण (रेडिस्ट्रिक्टिङ) योजनालाई ढिलो गर्न उनीहरू राज्यबाट बाहिरिएका थिए।
अहिले भने उनीहरू “विजयी भएर फर्किएको” घोषणा गर्दै राजधानी फर्किएका छन्।
टेक्सासका गभर्नर ग्रेग एबटले नयाँ विशेष अधिवेशन बोलाइसकेका छन्। रिपब्लिकनहरूको बहुमत कायम राख्ने उद्देश्यले २०२६ को निर्वाचनका लागि नयाँ मतदान नक्सा पारित गरिने विशेष अधिवेशनमा अपेक्षा गरिएको छ।
तर, डेमोक्र्याट-नेतृत्वका राज्यहरूले पनि आफ्ना नक्सा फेरबदल गरेर रिपब्लिकनको फाइदालाई सन्तुलन गर्ने र सम्भावित बहुमत हासिल गर्ने तयारी गरिरहेका छन्।
डेमोक्र्याटहरूले टेक्सासमा तयार भएको नयाँ जिल्ला नक्सा १९६५ को मतदान अधिकार ऐन र अमेरिकी संविधानविपरीत रहेको दाबी गरेका छन्।
सोमबार टेक्सास विधानसभामा अधिवेशन बसे पनि रेडिस्ट्रिक्टिङ विधेयकमाथि मतदान भएन। बैठक केवल करिब ३० मिनेटमै सकियो।
तर, सभामुख डस्टिन बुरोजले डेमोक्र्याट सांसदहरू आगामी दिनमा उपस्थित हुने सुनिश्चित गर्न ध्यान केन्द्रित गरेका थिए।
गत शुक्रबार डेमोक्र्याट सांसदहरूलाई पक्राउ गर्न आदेश दिइएको थियो।
तर उनीहरूलाई सोमबार सार्वजनिक सुरक्षा अधिकृतको जिम्मामा छाडिएको र बुधबारको बैठकमा उपस्थित हुनुपर्ने सर्तसहित लिखित प्रतिबद्धता फारममा हस्ताक्षर गराइएको जनाइएको छ।
राष्ट्रपति डोनाल्ड ट्रम्पले रिपब्लिकनहरूको नयाँ प्रस्तावित नक्सालाई “ठूलो, सुन्दर कांग्रेस नक्सा” भन्दै तुरुन्त पारित गर्न आग्रह गरेका छन्।
यसैबीच, क्यालिफोर्निया, न्युयोर्क, न्यु जर्सी, न्यु ह्याम्पसायर र मेरिल्यान्डजस्ता डेमोक्र्याट-नेतृत्वका राज्यहरूले पनि प्रतिकारका उपायहरू ल्याउन तयारी गरिरहेका छन्।