खुट्टा सुन्निएपछि जाँच गर्दा ट्रम्पलाई क्रोनिक ‘भेनस इन्सफिसिएन्सी’को समस्या
प्रकाशित मिति : श्रावण १, २०८२ बिहीबार
राष्ट्रपति डोनाल्ड ट्रम्पको खुट्टामा सुन्निएको कारणले जाँच गर्दा उनलाई क्रोनिक भेनस इन्सफिसियन्सी भएको निदान भएको ह्वाइट हाउसले बिहीबार घोषणा गरेको छ । ७९ वर्षका ट्रम्पले ह्वाइट हाउस मेडिकल युनिटसँग विस्तृत जाँच गराएका थिए, जसमा डायग्नोस्टिक भास्कुलर अध्ययनहरू समावेश थिए ।
ट्रम्पको भेनस डपलर अल्ट्रासाउन्डहरू गरिएको र क्रोनिक भेनस इन्सफिसियन्सी पत्ता लागेको रिपोर्टमा उल्लेख छ । यो एक सामान्य अवस्था विशेष गरी ७० वर्षभन्दा माथिका व्यक्तिहरूमा पाइनेगर्छ । यो जाँच ट्रम्पले पछिल्ला केही हप्ताहरूमा खुट्टाको तल्लो भागमा हल्का सुन्निएको महसुस गरेपछि गरिएको थियो ।
डीप भेन थ्रोम्बोसिस वा धमनी रोगको कुनै प्रमाण नभएको रिपोर्टमा उल्लेख छ । ट्रम्पको प्रयोगशाला परीक्षणहरू सबै सामान्य सीमाभित्र थिए। ट्रम्पले इकोकार्डियोग्राम पनि गराएका थिए । त्यसमा हृदय विफलता, मृगौला समस्याहरू, प्रणालीगत रोगको कुनै संकेत देखिएको थिएन ।
क्रोनिक भेनस इन्सफिसियन्सी एक यस्तो अवस्था हो जसमा केही नसाहरूभित्रका भल्भहरूले ठीकसँग काम गर्दैनन्, जसका कारण रगतलाई नसाहरूमा जम्मा हुन वा एकत्रित हुन दिन्छ। प्रत्येक वर्ष लगभग १ लाख ५० हजार मानिसहरूलाई यो निदान हुन्छ र उमेरसँगै जोखिम बढ्छ। लक्षणहरूमा तल्लो खुट्टा वा गोडामा सुन्निने, खुट्टामा दुख्ने वा ऐंठन हुने, भेरिकोज भेन, दुखाइ वा छालामा परिवर्तनहरू समावेश हुन सक्छन्।
उपचारमा औषधि वा पछिल्लो चरणमा चिकित्सकीय प्रक्रियाहरू समावेश हुन सक्छन्। यसका कारण राष्ट्रपतिलाई कुनै असुविधा नभएको रिपोर्टमा जनाइएको छ । राष्ट्रपतिको हातको पछाडि देखिएको नीलो दागको बारेमा प्रतिकृया दिदै ह्वाइहाउसले बारम्बार हात मिलाउने र एस्पिरिनको प्रयोगका कारण त्यसो भएको बताएको छ । ट्रम्प आफ्नो दोस्रो कार्यकालमा राष्ट्रको सबैभन्दा वृद्ध राष्ट्रपति बन्नेछन्।