ट्रम्प प्रशासनले सहायता रकम रोकेपछि अमेरिकी विद्यालयहरु आर्थिक संकटमा जाने जोखिम
प्रकाशित मिति : असार २२, २०८२ आईतबार
अमेरिकी राष्ट्रपति डोनाल्ड ट्रम्पको प्रशासनले करिब ७ बिलियन अमेरिकी डलर बराबरको शिक्षा सहायता रकम रोक्ने निर्णय गरेपछि देशभरका विद्यालयहरू आर्थिक संकटमा परेका छन् ।
यी रकमहरू जुलाई १ मा वितरण हुने आशामा विद्यालयहरूले योजना बनाइरहेका थिए । शिक्षा मन्त्रालयले राज्यहरूलाई पठाएको इमेलमा रोकिएको रकमको विवरण उल्लेख गरिएको छ ।
८९० मिलियन डलर अंग्रेजी सिक्दै गरेका विद्यार्थीहरूका लागि, ३७५ मिलियन डलर प्रवासी किसानका बच्चाहरूका लागि शैक्षिक सहयोग,२.२ बिलियन डलर शिक्षक तालिमका लागि, १.४ बिलियन डलर स्कुलको अघिल्लो र पछिल्लो समयका कार्यक्रमहरू तथा १.३ बिलियन डलर कलेज परामर्श लगायत शैक्षिक सशक्तिकरण कार्यक्रमहरूको बजेट कटौती लागि समीक्षा भइरहेको ट्रम्प प्रशासनले पठाएको इमेलमा उल्लेख गरिएको छ ।
धेरैजसो डेमोक्र्याट सांसद, विभिन्न राज्य सरकारहरू र शिक्षा समर्थक समूहहरूले ट्रम्प प्रशासनको पछिल्लो कदमलाई गैरकानुनी भनेका छन् । उनीहरूले यसलाई कंग्रेसले स्वीकृत गरिसकेको रकमलाई अवैध रूपमा रोकिएको भनेर आरोप लगाएका छन ।
न्युयोर्कका विद्यालयहरूले अवैध आप्रवासी प्रवर्द्धनमा रकम खर्च गरेको, वासिङ्टन राज्य ले अमेरिकी छात्रहरूको लागि छुट्याइएको छात्रवृत्ति अवैध आप्रवासीहरूलाई निर्देशित गर्न प्रयोग गरेको तथा स्कुल सुधार कोष “क्वियर रेसिस्टेन्स इन द आर्ट्स” नामक सेमिनारका लागि प्रयोग गरिएको ट्रम्प प्रशासनले आरोप लगाएको छ ।
यस अनुदानले सन् २०२५–२६ शैक्षिक वर्षका लागि बजेटलाई स्थिर राख्ने उद्देश्य बोकेको थियो । तर सोमबार शिक्षा मन्त्रालयले राज्यहरूलाई पठाएको इमेलमा कोष वितरण सूचना कार्यक्रम समीक्षा सकिएपछि मात्र पठाइने उल्लेख गरिएको छ ।
क्यालिफोर्नियाका शिक्षा अधिकारीहरूले यो रकम रोक्नु राष्ट्रपति ट्रम्पको प्राथमिकताअनुसार खर्च सुनिश्चित गर्न गरिएको हो भनेर आलोचना गरेका छन ।
राज्यले यस निर्णयविरुद्ध कानुनी कदम चाल्ने चेतावनी पनि दिएको छ।
शिक्षा रकम रोक्ने निर्णयले राष्ट्रव्यापी रूपमा विद्यालयहरूलाई ठूलो आर्थिक चुनौतीमा पारेको छ ।
विशेषगरी प्रवासी, निम्न आयस्तरका, र अंग्रेजी सिक्ने विद्यार्थीहरू सबैभन्दा बढी मारमा परेका छन् । राज्यहरू र शिक्षा समर्थक समूहहरूले अब कानुनी चुनौतीको तयारी गरिरहेका विश्लेषकहरुले बताएका छन ।