विदेशमन्त्री रुबियोले भने: अमेरिकालाई जानकारी दिएरै इरानमाथि इजरायलले आक्रमण गर्यो
प्रकाशित मिति : जेष्ठ २९, २०८२ बिहीबार
photo by Freddie Everett
इजरायलले इरानमाथि आक्रमण गरेपछि अमेरिका र इरानबीच वार्तालाई थप संकटमा पार्दै क्षेत्रीय युद्धको खतरा बढेको छ ।
इजरायलले इरानको आणविक कार्यक्रम र सैन्य स्थलहरूलाई लक्षित गर्दै ‘अपरेसन राइजिङ्ग लाइन’ दिइएको ठूलो हवाई आक्रमण सुरु गरेपछि पश्चिम एसियामा तनाव तीव्र बनेको हो ।
इजरायली प्रधानमन्त्री बेन्जामिन नेतन्याहू ले इरानले उच्च स्तरको युरेनियम संवर्द्धन गरी हतियार बनाउने क्रम चलाउन थालेकाले आक्रमण आवश्यक रहेको दावी गरेका छन ।
इजरायलले आवश्यक ठानेसम्म आक्रमण जारी रहने उनले बताएका छन । इजरायलले राष्ट्रिय आपतकाल घोषणा गर्दै प्रतिआक्रमणको सम्भावना उच्च रहेको बताएको छ ।
अमेरिकी विदेश मन्त्री मार्को रुबियो ले विज्ञप्ति जारी गर्दै इरानमाथिको आक्रमणमा अमेरिका संलग्न छैन भनेर भनेका छन । अमेरिकाको प्राथमिकता क्षेत्रका अमेरिकी फौजको सुरक्षा हो भनेर उनले भनेका छन ।
इरानले अमेरिकी स्वार्थ र कर्मचारीमाथि हमला नगर्ने उनले विश्वास गरेका छन । रुबियोले बताएअनुसार, इजरायलले अमेरिकालाई यस कारबाहीबारे जानकारी दिएको थियो । यसलाई ‘आफ्नो आत्म रक्षाका लागि आवश्यक’ भनेको थियो।
अमेरिकी राजदूतावासले इराकबाट आंशिक रूपमा कर्मचारीहरूलाई हटाइसकेको छ । इजरायलमा रहेका अमेरिकी कर्मचारीहरूलाई तेलबिभ क्षेत्रमै सीमित राख्न निर्देशन दिइएको छ ।
अन्तर्राष्ट्रिय परमाणु उर्जा एजेन्सीले भर्खरै इरानले आणविक दायित्वहरू पूरा नगरेको रिपोर्ट प्रकाशित गरेको छ ।
राष्ट्रपति डोनाल्ड ट्रम्पका मध्यपूर्व प्रतिनिधि स्टीव विट्कफ आइतबार इरानी अधिकारीहरूसँग आणविक वार्ताको अर्को चरण गर्न तय गरिएको थियो । तर अब त्यो वार्ता अनिश्चित बनेको छ।
इजरायलको एकल कदमले इरानलाई प्रतिउत्तरमा धकेल्ने खतरा बढेको छ । अमेरिकाले आफ्ना फौज र दूतावासहरूलाई सुरक्षा दिन सक्रिय तयारी गरिरहेको छ ।