अमेरिकी गोप्य दस्तावेज चुहाएको आरोपमा पूर्व सिआईए विश्लेषकलाई ३७ महिनाको जेल सजाय
प्रकाशित मिति : जेष्ठ २८, २०८२ बुधबार
इजरायलले इरानमाथि आक्रमण गर्न लागेको योजनासम्बन्धी गोप्य अमेरिकी दस्तावेज चुहाएको आरोपमा एक पूर्व सिआईए विश्लेषकलाई ३ वर्षभन्दा बढीको जेल सजाय सुनाइएको छ।
३४ वर्षीय आसिफ विलियम रहमानले यस वर्ष जनवरीमा जासुसी ऐन अन्तर्गत राष्ट्रिय सुरक्षासम्बन्धी गोप्य जानकारीको जानाजान संरक्षण र हस्तान्तरण गरेको आरोपमा दोष स्वीकार गरेका थिए।
अधिकारिहरूका अनुसार रहमानले आफ्नो उच्च स्तरको सुरक्षा अनुमतिलाई दुरुपयोग गर्दै टप सेक्रेट दस्तावेजहरू प्रिन्ट, फोटोग्राफ र पठाएका थिए । पछि सामाजिक सञ्जालमार्फत ति दस्तावेजहरु सार्वजनिक भएका थिए ।
गत वर्ष अक्टोबरमा इजरायलले इरानले मिसाइल आक्रमण गरेपछि प्रतिक्रिया स्वरूप विभिन्न सैन्य ठेगानाहरूमा हवाई आक्रमण गरेको थियो ।
रहमानद्वारा चुहाइएका दस्तावेजहरूमा उक्त आक्रमणभन्दा पहिलाको तयारीसम्बन्धी विवरण र अमेरिकी मूल्यांकन रहेको बताइएको छ।
राष्ट्रिय सुरक्षा विभागका सहायक अटर्नी जनरल जोन आइसेनबर्गले महिनौंसम्म अभियुक्तले अमेरिकी जनतालाई धोका दिएको बताएका छन । उनले राष्ट्रको सबैभन्दा गोप्य सूचनाहरू चुहाएर आफूले लिएको शपथ तोडेका उनले बताए ।
२०२४ को अक्टोबरमा अमेरिकी रक्षा मन्त्रालयसम्बन्धी देखिने दस्तावेजहरू इरान समर्थित एक टेलिग्राम च्यानलमा प्रकाशित भएका थिए ।
ती दस्तावेजहरू फाइभ आईज गुप्तचर साझेदारी अन्तर्गत रहेका थिए । जसमा अमेरिका, बेलायत, क्यानडा, न्युजिल्याण्ड र अष्ट्रेलिया समावेश छन् ।
दस्तावेजमा इजरायलको अझै औपचारिक रूपमा स्वीकार नगएको परमाणु क्षमतासम्बन्धी सन्दर्भ पनि रहेको जनाइएको छ ।
यो प्रकरणले राष्ट्रिय सुरक्षाका गोप्य सूचना चुहाउँदा हुने गम्भीर कानुनी परिणाम र अन्तर्राष्ट्रिय कूटनीतिक प्रभावलाई उजागर गरेको छ।