अमेरिकामा सैन्य परेडको तयारी, राष्ट्रपति ट्रम्पको जन्मदिन पनि सोही दिनमै
प्रकाशित मिति : बैशाख १९, २०८२ शुक्रबार
अमेरिकी सेनाले सैन्य परेडको तयारी गरेको छ । अमेरिकी सेनाको २५०औं वार्षिकोत्सवका लागि सैन्य परेडको तयारी भएको ह्वाइट हाउसले पुष्टि गरेको छ ।
आगामी १४ जूनमा अमेरिकी सेनाको २५० औं वार्षिकोत्सव मनाउन वाशिंगटन डिसीको नेशनल मलमा सैन्य परेड आयोजना गरिनेछ । संयोगवश, सोही दिन राष्ट्रपति डोनाल्ड ट्रम्पको ७९ औं जन्मदिन पनि पर्छ ।
सेनाका प्रवक्ताले बताएअनुसार पूरै दिन चल्ने गरी यो उत्सव आयोजना हुने । जसमा ६ हजार ६०० सैनिक, १५० सवारीसाधन र ५० वटा विमान प्रदर्शन गरिनेछन् ।
ट्रम्पले राष्ट्रपति बनेको पहिलो कार्यकालमा नै सैन्य परेड गर्ने प्रस्ताव राखेका थिए । तर अनुमानित खर्च करिब ९० मिलियन डलर पुग्ने देखिएपछि योजना रद्द गरिएको थियो।
शुक्रबार, ट्रम्पले अर्को घोषणा गर्दै भेटेरान्स डेलाई विजय दिवसू भनेर पुनःनामकरण गर्ने योजना सार्वजनिक गरेका छन । यो नाम परिवर्तन अमेरिकी योगदानको सम्मान स्वरूप हो भने ट्रम्पले भनेका छन ।
सेनाले १४ जूनको सैन्य उत्सव भव्य बनाउन थप उपकरण प्रदर्शन, क्षमता प्रदर्शन र सामुदायिक सहभागिता पनि बढाइने बताएको छ ।
ट्रम्पले सन् २०१८ मा पहिलोपटक भेटेरान्स डेमा सैन्य परेड गर्ने प्रस्ताव राखेका थिए । उनले २०१७ मा पेरिसको बास्टिल डे समारोहमा सहभागी भएपछि अमेरिकाले पनि त्यसलाई आयोजना गर्नुपर्ने बताए।
ट्रम्पले ८ मेलाई पनि विजय दिवस मनाउने प्रस्ताव गरेका छन । यो दिन दोस्रो विश्वयुद्धको युरोपेली मोर्चामा जर्मनीले आत्मसमर्पण गरेको थियो ।
दुवै मितिहरू इतिहासमा महत्त्वपूर्ण छन् । ११ नोभेम्बर १९१८ मा पहिलो विश्वयुद्ध अन्त्य भएको थियो । ८ मे १९४५ मा जर्मनीले आत्मसमर्पण गरेसँगै दोस्रो विश्वयुद्ध युरोपमा समाप्त भएको थियो।
तर पछि, ह्वाइट हाउसकी प्रेस सचिव कैरोलीन लेविटले एक्स मा लेख्दै, ‘हामी सधैं भेटेरान्स डे को सम्मान गर्नेछौं र विश्वयुद्धहरू अन्त्य भएको दिनलाई ‘विजय दिवस’ को रूपमा पनि सम्झना गर्नेछौं भनेकी छन ।
यस वर्ष बेलायत, फ्रान्स, क्यानाडा लगायतका देशहरूले दोस्रो विश्वयुद्ध युरोपमा अन्त्य भएको ८० वर्ष पुगेको अवसरमा विजय दिवस मनाइरहेका छन् । सो अवसरमा रुसले पनि ग्रेट पाट्रियोटिक वार को नाममा विशाल परेडसहित समारोह आयोजना गर्दै आएको छ।
दोस्रो विश्वयुद्धमा करिब २७ लाख सोभियत नागरिकको मृत्यु भएको थियो । युद्धको सुरुआत १९३९ मा जर्मनी र सोभियत संघले पोल्याण्डमा हमला गर्दा भएको थियो।
न्यू अर्लिन्सस्थित अमेरिकी द्वितीय विश्वयुद्ध संग्रहालयका अनुसार युद्धमा करिब ४ लाख १८ हजार अमेरिकी मारिएका थिए । जसमध्ये ४ लाख १६ हजार सैनिक थिए।