अमेरिका र युक्रेनले जतिसक्दो चाँडो खनिज सम्झौतामा हस्ताक्षर गर्नुपर्छ : अर्थमन्त्री बेसेन्ट
प्रकाशित मिति : बैशाख ११, २०८२ बिहीबार
US-TREASURY-SECRETARY-SCOTT-BESSENT-ADDRESSES-THE-INTERNATIONAL
अमेरिकी अर्थमन्त्री स्कट बेसेन्टले युक्रेनका प्रधानमन्त्रीलाई दुवै मुलुकले महत्त्वपूर्ण स्रोत निष्कासन सम्झौतामा ‘जतिसक्दो चाँडो’ हस्ताक्षर गर्नुपर्ने बताएका छन् ।
युक्रेनी प्रधानमन्त्री डेनिस स्मिहल शनिबारसम्म संयुक्त राज्य अमेरिकाको भ्रमणमा थिए । उनको उद्देश्य अमेरिकालाई युक्रेनी स्रोत र दुर्लभ खनिजको खनन मुनाफाबाट रोयल्टी भुक्तानी दिन एक सम्झौता गर्नु थियो ।
सन् २०२२ मा रुसले युक्रेनमा आक्रमण गरेपछि आफ्ना पूर्ववर्ती जो बाइडेनले युक्रेनलाई दिएको सहायताको क्षतिपूर्तिका रूपमा अमेरिकी राष्ट्रपति डोनाल्ड ट्रम्प यो सम्झौता चाहान्छन् ।
तर, फेब्रुअरीमा ट्रम्प र उनका युक्रेनी समकक्षी भोलोदिमर जेलेन्स्कीबीचको टकरावले सम्झौताको काममा अवरोध सिर्जना गरेको थियो ।
अर्थ मन्त्रालयको संक्षिप्त विवरण अनुसार बेसेन्टले बुधबार स्मिहललाई ‘प्राविधिक वार्ता समाप्त गर्ने र संयुक्त राज्य अमेरिका र युक्रेनबीच आर्थिक साझेदारीमा जतिसक्दो चाँडो हस्ताक्षर गर्ने आवश्यकता’ बारे बताए ।
विवरण अनुसार बेसेन्टले दुई पक्षबीचको वार्तालाई ‘अत्यधिक फलदायी’ भनेका छन् ।
अमेरिकाले युक्रेनलाई शान्ति सम्झौता स्वीकार गर्न हप्तौँदेखि दबाब दिएको छ । उक्त सम्झौताले अहिले रुसको कब्जामा रहेको आफ्नो केही क्षेत्र छोड्न किएभलाई बाध्य पार्न सक्छ ।
वासिङ्टनले रुस र युक्रेनबीच चाँडै सहमति नभए शान्ति वार्ताबाट बाहिरिने धम्की दिएको छ ।
बिहीबार बिहानै मस्कोले किएभमा क्षेप्यास्त्र आक्रमण गर्नुभन्दा केही घण्टाअघि ट्रम्पले बुधबार उनको विश्वासमा रुसले शान्ति सम्झौताको आफ्नो भाग स्वीकार गरेको बताएका थिए ।