ट्रम्प प्रशासनको पहिलो रोजगारी प्रतिवेदन : फेब्रुअरीमा १ लाख ५१ हजार नयाँ रोजगारी थपियो
प्रकाशित मिति : फाल्गुन २३, २०८१ शुक्रबार
अमेरिकी राष्ट्रपति डोनाल्ड ट्रम्पको प्रशासन अन्तर्गत पहिलो पूर्ण रोजगारी प्रतिवेदन सार्वजनिक भएको छ। अमेरिकी श्रम तथ्यांक ब्यूरोले शुक्रबार सार्वजनिक गरेको तथ्यांक अनुसार फेब्रुअरी महिनामा अमेरिकी अर्थतन्त्रले एक लाख ५१ हजार नयाँ रोजगारी सिर्जना गरेको छ।
बेरोजगारी दर अघिल्लो महिनाको ४ प्रतिशतबाट बढेर ४ दशमलव १ प्रतिशत पुगेको छ। यो वृद्धिसँगै श्रम बजारको ऐतिहासिक विस्तार जारी रहेको देखिएको छ।
अर्थशास्त्रीहरूले एक लाख ६० हजार रोजगारी वृद्धि हुने अपेक्षा गरेका थिए, जुन अनुमानभन्दा केही कम भए पनि फेब्रुअरी महिनाको प्रतिवेदन श्रम बजारको मजबुत स्थितिको संकेत हो।
तर, अमेरिकाको समग्र आर्थिक भविष्य अझै अनिश्चित रहेको विज्ञहरू बताउँछन्। ट्रम्प प्रशासनद्वारा लिइएका केही महत्वपूर्ण नीतिगत परिवर्तनहरूले रोजगारी बजारमा प्रभाव पार्नसक्ने आँकलन गरिएको छ। पछिल्ला केही महिनाहरूमा रोजगारी कटौती र आर्थिक अस्थिरता बढ्दै गएको तथ्यांकले देखाएको छ।