शिक्षा मन्त्रालय खारेज गर्ने ट्रम्पको तयारी, रिपब्लिकनकै बिरोध
प्रकाशित मिति : फाल्गुन २२, २०८१ बिहीबार
अमेरिकी राष्ट्रपति डोनाल्ड ट्रम्पले शिक्षा मन्त्रालयलाई खारेज गर्ने तयारी गरेका छन । संभवत ट्रम्पले यसैसाता यो निर्णय लिन सक्ने संभावना देखिएको छ ।
ट्रम्पले संघीय सरकारको आकारलाई ठूलो मात्रामा घटाउने गरी बनाएको योजना अनुसार नै यो कदम चाल्न खोजेको देखिएको छ ।
अधिकारीहरूले तयार गरेको कार्यकारी आदेशमा शिक्षा मन्त्री लिंडा म्याकमाहोनलाई शिक्षा मन्त्रालयको निर्माण प्रक्रिया पुन सुरु गर्न निर्देशन दिइएको छ ।
ट्रम्पले लामो समयदेखि शिक्षा मन्त्रालय बन्द गर्ने बताएका थिए । मन्त्रालयलाई पूर्णरूपमा खारेज गर्नका लागि कंग्रेसको सहयोग आवश्यक पर्दछ ।
ट्रम्प प्रशासनले शिक्षा मन्त्रालय बन्द गर्ने प्रक्रिया सुरु गर्ने आदेश ड्राफ्ट गर्दैछ । ट्रम्पले कंग्रेसलाई यो मन्त्रालय समाप्त गर्ने कानूनी प्रक्रिया पास गर्न दबाव दिने योजना बनाएका छन् ।
शिक्षा मन्त्रालय खारेज गर्ने तयारीलाई विपक्षी डेमोक्रया्सहरुले भने विरोध गरेका छन ।
फिलाडेल्फिया क्षेत्रकी डेमोक्र्याट प्रतिनिधि म्याडेलिन डिनले ट्रम्पलाई शिक्षित मतदाता आवश्यक नपर्ने भएकाले उनले यो कदम चाल्न थालेको बताइन ।
उनको आरोप छ कि ट्रम्प र उनका अनुयायीलाई शिक्षित नागरिक चाहिदैन । यो कदमका बारेमा केहि रिपब्लिकन कंग्रेस सदस्यहरूले पनि शंका व्यक्त गरेका छन् ।
मेनकी सिनेटर सुजेन कोलिन्सले मन्त्रालय समाप्त गर्ने योजनालाई समर्थन नगर्ने बताइन ।
विशेष गरी अपाङ्गता भएका बालबालिका र कम आय भएका परिवारका लागि आवश्यक कार्यक्रमहरू शिक्षा मन्त्रालय अन्तर्गत रहेकाले आफनो विरोध हुने उनको भनाई छ ।
यदि ट्रम्पले मन्त्रालय समाप्त गर्न सफल भए केही कार्यक्रम र फन्डिङ अन्य एजेन्सीहरूमा सर्ने सम्भावना छ ।
शिक्षा मन्त्री म्याकमाहोनका अनुसार मन्त्रालयले १ ट्रिलियन डलरको संघीय बजेट प्राप्त गरेको भएता पनि अपेक्षित परिणाम ल्याउन सकिरहेको छैन ।