अमेरिका र बेलायतकाबीचमा चाँडै व्यापार सम्झौता हुने
प्रकाशित मिति : फाल्गुन १५, २०८१ बिहीबार
अमेरिकी राष्ट्रपति डोनाल्ड ट्रम्पले अमेरिका र बेलायत बीचको व्यापार सम्झौता चाँडै टुंगो लाग्ने बताएका छन । बेलायती प्रधानमन्त्री कीर स्टार्मरसँगको संयुक्त पत्रकार सम्मेलनमा ट्रम्पले यो खुलाशा गरेका हुन ।
बेलायती प्रधानमन्त्रीको व्हाइट हाउस भ्रमणको क्रममा बोल्दै ट्रम्पले वास्तविक व्यापार सम्झौताको परिकल्पना गरेका छन ।
बेलायतलाई अमेरिका अन्य व्यापार साझेदारहरूसँग गरेका केही उच्च करहरूबाट बच्न मद्दत पुर्याउन सक्ने खालको सम्झौताको हुने अपेक्षा गरिएको छ ।
कीरको अमेरिका भ्रमण प्रधानमन्त्री कार्यकालको महत्वपूर्ण क्षणको रूपमा हेरिएको छ । भ्रमणको क्रममा उनले यूक्रेनसँगको सम्झौताका बिषयमा कुरा गरेका छन ।
यूक्रेनसँगको सम्भावित सम्झौता र बेलायतको चागोस द्वीपसमूहमा मरीशससँगको सम्भावित सम्झौताका विषयमा ट्रम्पले पत्रकार सम्मेलनमा धारणा राखेका थिए ।
बेलायती प्रधानमन्त्री कीरले अमेरिकी सुरक्षा ग्यारेन्टी बिना रूसी राष्ट्रपति भ्लादिमिर पुटिनले यूक्रेनमा पुनःआक्रमण गर्न सक्ने बताएका छन ।
ट्रम्पले शुक्रबार यूक्रेनसँग हस्ताक्षर हुने खनिज सम्झौताले युक्रेनको सुरक्षामा ब्याकस्टप प्रदान गर्न सक्ने बताए ।
अमेरिकी श्रमिकहरु युक्रेनमा रहँदासम्म कोही कसैले युक्रेनमा हमला गर्न सक्नेछैन ट्रम्पले भनेका छन ।
