अमेरिकामा बसाई सरेर नयाँ सुरुवातका लागि न्यूयोर्क राज्य सबैभन्दा उत्कृष्ट
प्रकाशित मिति : फाल्गुन २, २०८१ शुक्रबार
अमेरिकामा बसाई सरेर नयाँ सुरुवातका लागि न्यूयोर्क राज्य सबैभन्दा उत्कृष्ट रहेको एक अध्ययनले देखाएको छ । हरेक वर्ष जीवनमा नयाँ सुरुवात गर्न खोज्ने मानिसहरू नयाँ ठाउँमा बसोबास गर्न चाहने गरेकोमा एक सर्वेक्षणमा ८२ प्रतिशत अमेरिकीहरूले नयाँ सुरुवात गर्न चाहेको देखिएको छ, जसमा धेरैले स्थान परिवर्तन गर्ने सोच बनाएका छन्।
भ्यु होम्सले मानिसहरू सर्ने मुख्य कारणहरूको आधारमा ६ प्रमुख मापदण्डहरू संकलन गरी कुन कुन राज्यहरू बसोबासका लागि उपयुक्त छन् भन्ने निर्णय गरेको छ।
नयाँ सुरुवातका लागि सबैभन्दा राम्रो ठाउँ पत्ता लगाउन विभिन्न मापदण्डहरु हेरिएको थियो ।
मानिसहरूको लागि आर्थिक स्वतन्त्रता प्रमुख कारण भएकाले जीवनयापनको खर्च, रोजगारी अवसरहरू र आर्थिक तथ्यांकलाई हेरिएको थियो । साथै अपराध दर, जीवनस्तर, र सामाजिक सम्बन्धजस्ता कारकहरू पनि महत्त्वपूर्ण मानिएको छ ।
बसाई सराई गरेर नयाँ सुरुवातका लागि न्यूयोर्क पहिलो स्थानमा रहेको छ। न्यूयोर्क रोजगारी अवसरहरू, जीवनस्तर र आर्थिक रूपमा बलियो राज्यको रूपमा उच्च स्थानमा आएको छ। क्यालिफोर्निया र टेक्सास क्रमशः दोस्रो र तेस्रो स्थानमा रहेका छन्।
राज्यहरूको छनोट जीवनस्तर, अपराध दर, आर्थिक तथ्यांक, र सामाजिक सम्बन्धको आधारमा गरिएको हो। २०२५ का लागि नयाँ सुरुवातका लागि शीर्ष १० राज्यहरूमा चौथोमा फ्लोरिडा, पाँचौंमा टेनेसी, छैठौंमा इलिनोय, सातौंमा पेन्सिलभेनिया, आठौंमा आयोवा, नवौंमा कोलोराडो र दशौंमा ओहायो रहेका छन् ।
न्यूयोर्कमा बस्न सबैभन्दा खराब स्थानहरू पनि सूचिकृत गरिएको छ । न्यूयोर्कका केही ठाउँहरू जीवनयापनका लागि उपयुक्त छैनन्। उच्च अपराध दर, महँगो जीवनयापन खर्च, र कमजोर अर्थतन्त्रका कारण यी स्थानहरू बस्न खराब मानिन्छन्।
बस्नका लागि खराब स्थानमा पहिलोमा बफेलो, दोश्रोमा रोचेस्टर, तेश्रोमा सिराक्यूस, चौथोमा नायग्रा फल्स र पाँचौंमा शेनेक्टाडी रहेका छन् । न्यूयोर्क बसोबासका लागि उत्कृष्ट राज्य भए पनि, केही सहरहरू बस्नका लागि चुनौतीपूर्ण मानिएका छन्। खराब सूचीमा न्यूयोर्क सिटी २० नम्बरमा छ ।
