युक्रेन युद्ध अन्त्य गर्नका लागि वार्ता गर्न अमेरिका र रुस सहमत
प्रकाशित मिति : माघ ३०, २०८१ बुधबार
अमेरिका र रुस युक्रेन युद्ध अन्त्य गर्नका लागि वार्ता गर्न सहमत भएका छन ।
अमेरिकी राष्ट्रपति डोनाल्ड ट्रम्प र रुसी राष्ट्रपति भ्यादिमिर पुटिनकाबीचमा भएको टेलिफोन कुराकानीमा दुवै नेता युक्रेन युद्ध अन्त्य गर्नका लागि वार्ता गर्न सहमत भएको बताइएको छ ।
पुटिनसँग लामो र फलदायी टेलिफोन वार्ता भएको ट्रम्पले बताएका छन ।
ट्रम्पले आफ्नो ट्रुथ सोशल प्लेटफर्ममा रुसका राष्ट्रपति पुटिनले वार्ताका लागि सहमति जनाएको र एक अर्का देशको भ्रमणको निमन्त्रणा दिएको उल्लेख गरेका छन ।
पछिल्लो समय युक्रेनी राष्ट्रपति भोलोडिमिर जेलेन्स्कीले ट्रम्पसँग ‘दीर्घकालीन र विश्वसनीय शान्ति’ को विषयमा कुरा गरेका छन् । अमेरिकाका रक्षा मन्त्रीले युक्रेन नेटोमा सामेल हुने संभावना कम रहेको बताइरहेको बेला यो धारणाबाहिर आएको हो ।
जेलेन्स्कीले शुक्रवार म्युनिकमा युक्रेनको रक्षा शिखर सम्मेलनको दौरान उपराष्ट्रपति जे डी भान्स र विदेश मन्त्री मार्को रुबियोसँग भेट्ने बताइएको छ ।
ट्रम्पले यो हास्यास्पद युद्ध बन्द गर्ने समय हो, जहाँ ठूलो मात्रामा र पूर्णतया अनावश्यक मृत्यु र विनाश भएको छ । भगवान रूस र युक्रेनका जनतालाई आशिर्वाद दिनुहोस् भनेर सामाजिक सञ्जालमा लेखेका छन ।
पुटिन र ट्रम्प बीचको फोन कल लगभग एक घण्टा लामो भएको थियो । टेलिफोन कुराकानीका क्रममा राष्ट्रपति पुटिनले ट्रम्पलाई रुस भ्रमणको निम्ता दिएका थिए ।
युक्रेन भन्दा बढी शान्ति चाहने कोही छैन । हामी र अमेरिकासँग मिलेर अगाडि बढ्ने योजना बनाउँदैछौं ताकि रुसको आक्रामकता रोकियोस् र दीर्घकालीन, विश्वसनीय शान्ति सुनिश्चित होस्, जेलेन्स्कीले भनेका छन ।
२०२२ को फेव्रुवरीमा रुसले युक्रेनमा आक्रमण सुरु गरेको थियो ।