आज हमासद्वारा तीन इजरायली र इजरायलद्वारा १८३ प्यालेस्टिनी बन्धकलाई रिहा गर्ने तयारी
प्रकाशित मिति : माघ २६, २०८१ शनिबार
गाजा पट्टीमा लागू युद्ध विरामको सर्तहरू अनुसार प्यालेस्टिनी समूह हमासले शनिबार तीन इजरायली बन्धकहरूलाई रिहा गर्दै छ । हमासले यी तीन इजरायली नागरिकहरूको नाम सार्वजनिक गरेको छ। हमास यस पटक तीन पुरुष बन्धकहरूलाई मुक्त गर्नेछ।
यसको बद्लामा इजरायलले आफ्ना जेलहरूमा बन्द १८३ प्यालेस्टिनी बन्धकहरूलाई रिहा गर्नेछ।
हमासले शनिबार ५२ वर्षे एली शरबी, ५६ वर्षे ओहद बेन अमी, र ३४ वर्षे लेवीलाई रिहा गर्ने निर्णय गरेको हो । यी तीन जनालाई ७ अक्टोबर, २०२३ मा हमासको नेतृत्वमा इजरायलमाथि आक्रमणको समयमा अपहरण गरिएको थियो। यस आक्रमणपछि इजरायलले गाजा क्षेत्रमा आक्रमण सुरु गरेको थियो र युद्ध सुरु भएको थियो। गत महिना, १९ जनवरीमा दुवै पक्ष युद्ध विराममा सहमत भएका थिए। युद्ध विरामपछि हालसम्म १८ इजरायली बन्धकहरू र ५५० भन्दा बढी प्यालेस्टिनी बन्धकहरूलाई रिहा गरिएको छ।
इजरायलले शनिबार रिहा गर्न लागेको १८३ प्यालेस्टिनी बन्धकहरूमा १८ जना त्यस्ता छन्, जसलाई घातक आक्रमणको लागि आजीवन कारावासको सजाय सुनाइएको थियो । त्यस्तै, ५४ जना लामो अवधिको सजाय भोगिरहेका छन्। यी १८३ व्यक्तिहरूमा १११ प्यालेस्टिनी बन्धक गाजाबाट छन्, जसलाई ७ अक्टोबरको आक्रमणपछि गिरफ्तार गरिएको थियो। यी सबै पुरुष हुन् र २० देखि ६१ वर्षसम्मका छन्।
गाजामा हमास र इजरायल बीच अहिले युद्ध विराम सम्झौता चलिरहेको छ। युद्ध विरामको यो चरण मार्चको सुरुवातसम्म चल्नेछ। युद्ध विराम सम्झौताका यस चरणअन्तर्गत ३३ इजरायली बन्धकहरू र १९०० प्यालेस्टिनी बन्धकहरूलाई रिहा गरिनु पर्छ।