संघीय कर्मचारी घटाउने ट्रम्पको योजनामा अदालतको रोक
प्रकाशित मिति : माघ २५, २०८१ शुक्रबार
संघीय कर्मचारी कटौटी गर्ने राष्ट्रपति डोनाल्ड ट्रम्पको योजनालाई अदालतले रोक लगाइदिएको छ ।
अमेरिकी संघीय न्यायाधीश जर्ज ओटुलले सोमबार हुने सुनवाइसम्म स्वेच्छाले राजीनामा दिन लगाउने ट्रम्पको प्रस्तावलाई स्थगित राख्न आदेश दिएका हुन ।
ट्रम्पले बिहिबाररातीसम्म संघीय कर्मचारीलाई स्वेच्छाले राजीनामा दिए ३० सेप्टेम्बरसम्मको तलव दिने प्रस्ताव ल्याएका थिए ।
असन्तुष्ट कर्मचारीहरुले अदालतमा दायर गरेको मुद्धाको औचित्यता पुष्टि गर्न आवश्यक देखिएको छ । संघीय कर्मचारीको आकार घटाएर खर्च जोगाउने ट्रम्प प्रशासनको हिस्सा स्वरुप यो योजना ल्याइएको हो ।
व्हाइट हाउसले ४० हजार भन्दा बढी कर्मचारीहरूले राजीनामा दिने प्रस्ताव स्वीकार गरेका दावी गरेको छ ।
व्हाइट हाउसले अदालतबाट आएको अस्थायी रोकलाई राजीनामा दिनेको संख्या बढाउनसक्ने समयको रुपमा हेरेको छ ।
कार्यालयमा उपस्थित नहुने तर घरबाटै काम गर्ने कर्मचारीको संख्या मुख्यत घटाउनका लागि योजना ल्याइएको अमेरिकी सरकारले बताएको छ ।
ट्रम्प प्रशासनले २ लाख कर्मचारीहरूले यो प्रस्ताव स्वीकार गर्ने अपेक्षा गरेको थियो ।
डेमोक्र्याटहरूले राजीनामा प्याकेजको वैधता माथि प्रश्न उठाएका छन् । यसले ‘ब्रेन ड्रेन’ निम्त्याउने चेतावनी दिएका छन् । जसको प्रभाव ‘प्रत्येक अमेरिकीले महसुस गर्नेछ।’ उनीहरुले भनेका छन ।