फेब्रुअरी १ बाटै चिनियाँ सामानको आयातमा १० प्रतिशत शुल्क लगाउनसक्ने राष्ट्रपति ट्रम्पको संकेत
प्रकाशित मिति : माघ ८, २०८१ मंगलबार
अमेरिकी राष्ट्रपति डोनाल्ड ट्रम्पले १ फेब्रुअरीबाटै चिनियाँ सामानको आयातमा १० प्रतिशत शुल्क लगाइने संभावना रहेको बताएका छन । यो विषयमा विचार गरिरहेको उनले जनाउ दिएका छन ।
ट्रम्पले आफ्नो प्रशासनसँगको छलफलको आधार भनेको ‘फेन्टानिल मेक्सिको र क्यानडामा पठाइरहेको भन्ने तथ्य’ रहेको बताएका हुन ।
यसअघि ट्रम्पले मेक्सिको र क्यानडाबाट अमेरिका प्रवेश गर्ने अवैध आप्रवासी र लागूपदार्थलाई लिएर २५ प्रतिशत आयात कर लगाउने धम्की दिएका थिए।
वाशिङ्टनमा आयोजित पत्रकार सम्मेलनमा ट्रम्पले युरोपेली युनियनलाई पनि शुल्कको दायरामा ल्याउने प्रतिबद्धता व्यक्त गरे ।
‘चीन दुरुपयोगकर्ता हो, तर युरोपेली युनियनले पनि अमेरिकासँग धेरै खराब व्यवहार गर्छ’ उनले भने ।
अमेरिकालाई न्याय दिलाउने एकमात्र उपाय भनेको युरोपेली युनियनलाई पनि शुल्कको दायरमा ल्याउनु भएको उनले भनेका छन ।
सोमबार राष्ट्रपति पदको शपथ लिएलगत्तै, ट्रम्पले संघीय एजेन्सीहरूलाई वर्तमान व्यापार सम्झौताहरूको समीक्षा गर्न र अमेरिकी व्यापार साझेदारहरूले अपनाएका अनुचित व्यवहारहरू पहिचान गर्न निर्देशन दिएका थिए।
चुनावी प्रचारका क्रममा ट्रम्पले चिनियाँ सामानमाथि ६० प्रतिशत सम्म शुल्क लगाउने वाचा गरेका थिए । क्यानडा, चीन र मेक्सिको अमेरिकाका ठूला व्यापार साझेदार हुन् ।
शुल्क ट्रम्पको आर्थिक योजनाको महत्त्वपूर्ण हिस्सा हो । ट्रम्पका अनुसार यसले आर्थिक वृद्धिमा योगदान, रोजगारीको सुरक्षा र राजस्व वृद्धि गर्न सक्छ।
तर, धेरै अर्थशास्त्रीहरूले यस्ता कदमले अमेरिकी उपभोक्ताका लागि सामानको मूल्य वृद्धि गर्ने बताएका छन ।