चिनियाँ सरकारद्वारा अमेरिकामा टिकटक एलन मस्कलाई बिक्री गर्नेबारे विचार गर्दै
प्रकाशित मिति : माघ १, २०८१ मंगलबार
चिनियाँ सरकार एलन मस्कलाई टिकटकको अमेरिकी अपरेसन खरिद गर्न प्रस्ताव राख्ने विषयमा विचार गरिरहेको छ। यस कदमले एपलाई प्रभावकारी रूपमा प्रतिबन्धित हुनबाट जोगाउन सक्छ।
यो योजना चीनले विचार गरिरहेका विभिन्न विकल्पहरूमध्ये एक हो। अमेरिकी सर्वोच्च अदालतले जनवरी १९ सम्म टिकटकको अमेरिकी व्यापारलाई चीनमा आधारित कम्पनी बाइटडान्सबाट अलग गर्नुपर्ने कानूनी आदेशलाई समर्थन गर्ने या नगर्ने निर्णय गर्ने तयारीमा छ।
त्यस समयसीमापछि, कुनै तेस्रो पक्ष इन्टरनेट सेवा प्रदायकले अमेरिकामा टिकटकको अपरेसनलाई सहयोग गरेमा कानूनी सजाय भोग्नुपर्नेछ।
प्रस्तावित योजनाअनुसार, एलोन मस्कले हाल आफ्नो स्वामित्वमा रहेको सोशल मिडिया प्लेटफर्म एक्स र टिकटकको अमेरिकी अपरेसन दुवैको व्यवस्थापन हेर्नेछन्। तर, चिनियाँ अधिकारीहरूले यो योजना अघि बढाउने कि नगर्ने निर्णय गरिसकेका छैनन्, र यो योजना हाल प्रारम्भिक चरणमै रहेको छ।
बाइटडान्सले चिनियाँ सरकारको यस योजनाबारे जानकारी राखेको छ कि छैन भन्ने स्पष्ट छैन। टिकटक र मस्कबीच कुनै छलफल भएको छ कि छैन भन्ने विषयमा पनि कुनै प्रमाण उपलब्ध छैन। यसैबीच, चिनियाँ वरिष्ठ अधिकारीहरूले टिकटकको अमेरिकी भविष्यबारे छलफल गरिरहेका छन्, जुन राष्ट्रपति डोनाल्ड ट्रम्पसँगको समन्वयका विषयमा केन्द्रित रहेको बताइएको छ।
टिकटकका प्रवक्ताले भनेका छन्, “हामी केवल अडकलबाजीमा आधारित विषयमा टिप्पणी गर्न सक्दैनौं।” उता, एलोन मस्कको प्लेटफर्म एक्सले यस विषयमा कुनै प्रतिक्रिया दिएको छैन।
गत हप्ता अमेरिकी सर्वोच्च अदालतले टिकटकलाई प्रतिबन्ध लगाउन सक्ने कानूनबारे मौखिक बहस गरेको थियो। यो कानून राष्ट्रपति जो बाइडेनले अप्रिलमा हस्ताक्षर गरेका थिए। टिकटकको कानूनी टोलीले यस कानूनले अमेरिकाका लाखौं प्रयोगकर्ताको अभिव्यक्ति स्वतन्त्रताको अधिकार उल्लङ्घन गर्ने तर्क गरेको छ। अर्कोतर्फ, अमेरिकी सरकारले बाइटडान्सको स्वामित्वले राष्ट्रिय सुरक्षामा जोखिम पुर्याउने दाबी गरेको छ।
सर्वोच्च अदालत सरकारले प्रतिबन्धको पक्षमा निर्णय लिने सम्भावना देखिएपछि, टिकटकले डोनाल्ड ट्रम्पको दोस्रो कार्यकाल सुरु भएपछि सहयोग खोज्न सक्ने अनुमान गरिएको छ। ट्रम्पले आफ्नो पहिलो कार्यकालमा टिकटक प्रतिबन्धको समर्थन गरेका थिए। तर पछिल्लो समयमा ट्रम्पको धारणा परिवर्तन भएको देखिएको छ।
गत महिनाको अन्त्यमा ट्रम्पले सर्वोच्च अदालतलाई बाइडेनको प्रतिबन्ध कार्यान्वयन ढिला गर्न अनुरोध गरेका थिए, ताकि उनी “राजनीतिक समाधान” खोज्न पर्याप्त समय पाउन सकून्।
फेब्रुअरीमा अरबपति जेफ याससँगको भेटपछि ट्रम्पको टिकटकप्रतिको दृष्टिकोण परिवर्तन भएको थियो। यास रिपब्लिकन पार्टीका प्रमुख दाता र बाइटडान्सका ठूला लगानीकर्तामध्ये एक हुन्। साथै, उनी ट्रम्पको सोशल मिडिया प्लेटफर्म ट्रुथ सोसलको मालिक कम्पनीमा पनि हिस्सेदारी राख्छन्।