न्युयोर्कबाट उडेको जेटब्लू विमानको ल्यान्डिङ गियरमा २ वटा शव
प्रकाशित मिति : पुस २३, २०८१ मंगलबार
न्युयोर्कको जोन अफ केनेडी विमानस्थलबाट प्रस्थान गरेर फ्लोरिडाको फोर्ट लाउडरडेल विमानस्थलमा अवतरण गरेको जेटब्लु विमानको ल्यान्डिङ गियर कम्पार्टमेन्ट भित्र दुईवटा शव फेला परेको जनाइएको छ । सोमबार राति ११ बजेपछि शव फेला परेको हो ।
विमान फोर्ट लाउडरडेल हलिउड अन्तर्राष्ट्रिय विमानस्थलमा पुगेपछि नियमित उडान पछिको मर्मतसम्भार निरीक्षणका क्रममा शव भेटिएको हो । व्यक्तिहरूको पहिचान र उनीहरुले कसरी विमानमा पहुँच गरे भन्ने लगायतका परिस्थितिहरू अनुसन्धानमा रहेको जेटब्लु एयरलाइन्सका अधिकारीले बताएका छन् ।
एयरलाइन्सले यो एक हृदयविदारक अवस्था रहेको र घटनाबारे आफूहरु अधिकारीहरूसँग मिलेर काम गर्न प्रतिबद्ध रहेको बताएको छ । मंगलबार विहानसम्म मृतकको नाम सार्वजनिक गरिएको छैन ।
हवाईमा अवतरण गरेको युनाइटेड एयरलाइन्सको विमानको ह्वीलवेल भित्र क्रिसमसको पूर्वसन्ध्यामा एक व्यक्ति मृत फेला परेको झण्डै दुई हप्तापछि यो घटना भएको हो । दुई व्यक्ति कसरी ल्यान्डिङ गियरमा पुगे भन्ने प्रस्ट नभएपनि व्यक्तिहरु उडानहरूमा यसरी लुकेका घटना नयाँ भने होइनन् ।