अमेरिकाको भर्जिनियामा ठुलो परिमाणमा बम भेटियो, एकजना पक्राउ
प्रकाशित मिति : पुस १७, २०८१ बुधबार
अमेरिकाको भर्जिनियामा ठुलो परिमाणमा बम फेला परेको छ । एफबीआईले त्यहाँ रहेको एउटा फार्ममा छापा मार्दा १५० भन्दा बढी बम फेला पारेको हो ।
यो घटनालाई एफबीआईको इतिहासमा अहिलेसम्मकै ठूलो बम बरामदको रूपमा लिइएको छ ।
डिसेम्बर १७ मा वाशिङ्टन डिसीबाट २९० किलोमिटर दक्षिणमा रहेको आइल अफ वाइट काउन्टीमा ब्राड स्पाफोर्डलाई पक्राउ गरिएको थियो ।
उनलाई आफ्नी श्रीमती र दुई साना बच्चाहरूसँग बस्दै आएको सम्पत्तिमा हतियार र घरमै बनाइएको गोला बारुद भण्डारण गरिरहेको सूचनाको आधारमा पक्राउ गरिएको हो ।
अनुसन्धानकर्ताहरूले केही बमहरू एउटा कोठामा अनियमित रूपमा रहेको र “#nolivesmatter” लेखिएको झोलामा फेला पारेका थिए । यो नारा प्रायः दक्षिणपन्थी, सरकारविरोधी समूहहरूसँग सम्बन्धित मानिन्छ ।
स्पाफोर्डका वकिलले उनी समुदायका लागि खतरनाक व्यक्ति नभएको दाबी गर्दै उनलाई हिरासतबाट रिहा गर्न माग गरेका छन् ।
हालसम्म स्पाफोर्डलाई दर्ता नगरिएको सर्ट बारेल राइफल राखेको आरोपमा मात्रै अभियोग लगाइएको छ । तर अनुसन्धानकर्ताहरूले अन्य थप आरोप लगाइने सम्भावना रहेको बताएका छन् ।
एफबीआईले यी बमहरूलाई संख्या अनुसार एफबीआईको इतिहासमै सबैभन्दा ठूलो बरामद बमहरू को रूपमा प्रारम्भिक रूपमा मूल्यांकन गरिएको जनाएको छ ।
स्पाफोर्डले अमेरिकी राष्ट्रपति जो बाइडेनको तस्वीरलाई निशाना बनाएर अभ्यास गरेको र उपराष्ट्रपति कमला ह्यारिसको हत्या होस् भन्ने चाहना व्यक्त गरेका देखिएको छ ।
सन् २०२१ मा आफुले नै बनाएको विस्फोटक उपकरणको कारण दाहिने हातका तीन औँला गुमाए पनि उनी बम भने बनाइरहेको छिमेकीले जानकारी दिएका छन् ।
पाइप बमहरूको अलावा, अनुसन्धानकर्ताहरूले अत्यधिक अस्थिर विस्फोटक पदार्थ एचएमटीडीको एउटा जार फेला पारेका थिए । यो पदार्थको विस्फोट तातो वा चिसोको सानोतिनो परिवर्तनले पनि हुन सक्छ ।
अदालतले स्पाफोर्डलाई इलेक्ट्रोनिक निगरानीसहित रिहा गर्न आदेश दिए पनि सरकारको मागमा यो निर्णयलाई हाललाई स्थगित गरिएको छ ।