अमेरिकी पूर्व राष्ट्रपति क्लिन्टन अस्पताल भर्ना, अवस्थाको बारेमा प्रवक्ता यसो भन्छन्
प्रकाशित मिति : पुस ८, २०८१ सोमबार
पूर्व अमेरिकी राष्ट्रपति बिल क्लिन्टनलाई अस्पताल भर्ना गरिएको छ । ज्वरो आएको कारण उनलाई अस्पतालमा भर्ना गरिएको हो ।
डेमोक्र्याटीक पार्टीका तर्फबाट क्लिन्टनका प्रवक्ता एन्जेल उरेनाले उच्च मनोबल र उत्कृष्ट उपचारका लागि अस्पताल भर्ना गरिएको बताएका छन ।
क्लिन्टनलाई सोमबार साँझ वाशिंगटन डीसीको जर्जटाउन युनिभर्सिटी मेडिकल सेन्टरमा परीक्षण र निरीक्षणका लागि भर्ना गरिएको हो ।
उरेनाले अर्कान्सासका डेमोक्र्याट क्लिन्टनको स्वास्थ्य अवस्थाबारे थप विवरण दिएका छैनन । यद्यपि, अमेरिकी सञ्चारमाध्यमहरूले क्लिन्टन छिट्टै निको हुने अपेक्षा गरिएको बताएका छन् ।
क्लिन्टनसँग निकट स्रोतले स्थिति गम्भीर नरहेको र पूर्व राष्ट्रपति ठीक हुने जानकारी दिएको छ । १९९३ देखि २००१ सम्मका ४२ औ राष्ट्रपतिको यो पछिल्लो स्वास्थ्य समस्या हो ।
७८ वर्षीय क्लिन्टनलाई २०२१ मा रगतमा संक्रमण देखिएपछि क्यालिफोर्नियाको अस्पतालमा छ दिनसम्म भर्ना गरिएको थियो । उनी विगतमा मुटुको समस्याबाट पीडित रहँदै आएका छन्।
५८ वर्षको उमेरमा २००४ मा क्लिन्टनले बाइपास शल्यक्रिया गराएका थिए । त्यसपछि २०१० मा छातीमा पीडा भएपछि बन्द भएका धमनी खोल्न अर्को शल्यक्रिया गराएका थिए ।
दोस्रो शल्यक्रियापछि, धेरै चिल्लो खाना मन पराउने क्लिन्टनले आफ्नो जीवनशैली परिवर्तन गर्दै शाकाहारी भएका थिए ।
यस वर्षको राष्ट्रपतिको चुनावी अभियानमा क्लिन्टन सक्रिय थिए । उपराष्ट्रपति कमला ह्यारिसको समर्थन गर्न उनले देशभर यात्रा गरेका थिए ।