ट्रम्पको प्रस्ताव समावेशविना पारित बिलमा बाइडेनबाट हस्ताक्षर, हट्यो सरकार शटडाउनको जोखिम
प्रकाशित मिति : पुस ६, २०८१ शनिबार
(फोटो: रिचर्ड पियेरिन / एएफपी)
राष्ट्रपति जो बाइडेनले शनिबार एक खर्च विधेयकमा हस्ताक्षर गरेपछि अमेरिकी सरकार शटडाउन संकटबाट जोगिएको छ । संसदले विधेयक पारित गरेपछि शनिबार विहान राष्ट्रपतिको टेबुलमा लगिएको थियो । यो प्याकेजले मार्च १४ सम्म सरकार संचालनका लागि कोष प्रदान गर्छ ।
नवनिर्वाचित राष्ट्रपति डोनाल्ड ट्रम्पले माग गरेको ऋण सीमा विस्तार समावेश नगरिकनै विधेयक पारित गरिएको हो । यसले रिपब्लिकनहरूले खोजेका अरबपतिहरूको लागि कर कटौतीको द्रुत मार्गलाई अस्वीकार गर्ने र यसले सरकारले पूर्ण क्षमतामा काम गर्न जारी राख्न सक्ने सुनिश्चित गर्ने बाइडेनले बताएका छन् ।
प्रतिनिधिसभाले विधेयक पारित गरे लगत्तै सिनेटले शनिबार राति विधेयक पारित गरेको हो । सिनेटमा विधेयकका पक्षमा ८५ र विपक्षमा ११ भोट खसेको थियो । त्यस अगाडि प्रतिनिधिसभामा विधेयकका पक्षमा ३६६ र विपक्षमा ३४ भोट खसेको थियो ।
ट्रम्प र उनका सहयोगी एलन मस्कले प्रारम्भिक द्विपक्षीय सम्झौताको सार्वजनिक रूपमा विरोध गरेपछि खर्च विधेयक पारित हुनमा ढिलो भएको थियो । ट्रम्प र मस्कले सम्झौताको विरोध गर्नासाथ संसदमा रिपब्लिकनहरूले तुरुन्तै सम्झौताको आलोचना सुरु गरेका थिए । प्रारम्भिक द्विपक्षीय सम्झौता टुटेपछि सदनले बिहीबार बिल पारित गर्न असफल भएको थियो ।
तरपछि बिलमा संसोधन गरेर द्विपक्षीय सम्झौता कायम गरिएको थियो । ट्रम्पले रिपब्लिकनहरूलाई ऋण सीमा विस्तार गर्न वा रद्द गर्न पनि आग्रह गरेपनि यसलाई अन्तिम बिलमा नराखिकनै पारित गरिएको छ ।