अमेरिकी सीमानामा क्यानडाले थप सुरक्षा उपायहरू लागू गर्ने
प्रकाशित मिति : पुस २, २०८१ मंगलबार
क्यानडाले अमेरिकी सीमामा नयाँ सुरक्षा उपायहरू लागू गर्ने वाचा गरेको छ । यसमा सशक्त निगरानी र अन्तर्राष्ट्रिय संगठित अपराधलाई लक्षित गर्ने संयुक्त स्ट्राइक फोर्स को स्थापना पनि समावेश छ ।
यो प्रतिबद्धता अमेरिकी राष्ट्रपति निर्वाचित डोनाल्ड ट्रम्पको चेतावनीपछि आएको हो ।
ट्रम्पले जनवरीमा पद ग्रहण गरेपछि, क्यानडाले अनियमित आप्रवासी र अवैध लागूऔषधको प्रवाहलाई रोक्न सीमा सुरक्षित नगरे २५ प्रतिशत कर क्यानाडाली सामानमा लगाउने धम्की दिदै आउनु भएको छ ।
अर्थशास्त्रीहरूले भनेका छन् कि यस्तो करले क्यानडाको अर्थतन्त्रलाई ठूलो प्रभाव पार्न सक्छ ।
यो योजनाको विवरण घोषणा गर्दै क्यानडाका वित्तमन्त्री र अन्तर सरकारी मामिलाका मन्त्री डोमिनिक लेब्लाङ्कले संघीय सरकारले यसका लागि १दशमल ३ अर्ब क्यानाडेली डलर अर्थात ९० करोड अमेरिकी डलर छुट्याउने बताएका छन्।
यी उपायहरूले गैरकानुनी लागूऔषध र अनियमित आप्रवासनको प्रवाहलाई रोक्नेछ । साथै मानिस र सामानको स्वतन्त्र प्रवाहलाई सुनिश्चित गर्नेछ, जुन उत्तर अमेरिकाको समृद्धिको आधार हो, मन्त्री लेब्लाङ्कले भनेका छन ।
योजनाका पाँच स्तम्भहरूमा फेन्टानाइल व्यापारको अवरोध, कानून प्रवर्तनका लागि नयाँ उपकरणहरू, अमेरिकी कानून प्रवर्तनसँग समन्वयको सुदृढीकरण, जानकारीको आदानप्रदानमा वृद्धि, र सीमामा आवागमन सीमित गर्ने समावेश छन् ।
यसमा हेलिकप्टर, ड्रोन, र पोर्टहरूको बीचमा मोबाइल निगरानी टावरहरू सहितको प्रस्तावित हवाई निगरानी कार्यबल समावेश छ ।