छोरा हन्टरलाई माफी दिएको राष्ट्रपति बाइडेनद्धारा घोषणा
प्रकाशित मिति : मंसिर १७, २०८१ सोमबार
अमेरिकी राष्ट्रपति जो बाइडेनले आफ्ना छोरा हन्टर बाइडेनलाई औपचारिक रूपमा माफी दिनुभएको छ ।
हन्टर बाइडेनलाई दुई आपराधिक मुद्धामा सजाय सुनाउने तयारी भइरहेको बेला राष्ट्रपति बाइडेनले यो निर्णय गर्नुभएको हो । यसअघि उहाँले छोरा हन्टरलाई माफी नदिने बताउनु भएको थियो ।
राष्ट्रपति बाइडेनले आफ्नो छोरालाई विशेष रूपमा लक्षित गरिएको र यस घटनालाई न्यायको ठुलो त्रुटि भन्नुभएको छ ।
हन्टर बाइडेन सेप्टेम्बर महिनामा करसम्बन्धी मुद्दामा दोषी ठहर भएका थिए । जुन महिनामा लागू औषधको लतको क्रममा हतियार राखेको अभियोगमा पनि दोषी पाइएका थिए । हन्टर वर्तमान राष्ट्रपति पदमा बसेका व्यक्तिको अपराधमा दोषी ठहरिने पहिलो सन्तान बनेका थिए ।
राष्ट्रपति निर्वाचित डोनाल्ड ट्रम्पले माफीलाई न्यायको दुरुपयोग भन्दै टिप्पणी गर्नुभएको छ । यो माफीलाई डोनाल्ड ट्रम्पले राष्ट्रपतिको कार्यभार सम्हालेपछि पनि उल्टाउन सक्नुहुने छैन ।
राष्ट्रपति बाइडेनले भन्नुभएको छ म न्याय प्रणालीमा विश्वास गर्छु, तर राजनीतिले यस प्रक्रियालाई असर पारेको छ र यसले न्यायको त्रुटि निम्त्याएको छ ।
हन्टर बाइडेन पाँच वर्ष छ महिनादेखि लतबाट मुक्त रहेको राष्ट्रपति बाइडेनले बताउनु भएको छ । यसअघि पनि २००१ मा बिल क्लिन्टनले आफ्ना सौतेनी भाइ रोजर क्लिन्टनलाई सन् १९८५ को कोकिनसँग सम्बन्धित अपराधका लागि माफी दिनुभएको थियो ।
२०२० मा डोनाल्ड ट्रम्पले आफ्ना ज्वाइँ इभाङ्का ट्रम्पका बुबा चाल्र्स कुशनरलाई माफी दिनुभएको थियो । ट्रम्पले कुशनरलाई फ्रान्सका लागि नयाँ राजदूतको रूपमा नियुक्त गर्ने घोषणा गर्नुभएको छ ।
हन्टर बाइडेनले सेप्टेम्बरमा संघीय कर छलसम्बन्धी नौ अभियोगमा दोष स्वीकारेका थिए । जसका लागि उनलाई १७ वर्षसम्मको जेल सजाय हुन सक्थ्यो ।
त्यसैगरी, जुन महिनामा हतियार खरिदसँग सम्बन्धित तीन गम्भीर अपराधमा दोषी ठहरिएका थिए । जसका लागि उनलाई २५ वर्षसम्मको जेल सजाय हुन सक्थ्यो । यी मुद्दाहरूमा १२ र १६ डिसेम्बरमा सजाय तोकिएको थियो ।