शवका अवशेषहरूबाट अमेरिकाको पेन्सिलभेनियामा बेपत्ता किशोरीको ५० वर्षपछि पहिचान पुष्टी
प्रकाशित मिति : मंसिर ९, २०८१ आईतबार
अमेरिकाको पेन्सिलभेनियामा ५० वर्षअघि बेपत्ता किशोरीका अवशेषहरूको पहिचान पुष्टी भएको छ । पेन्सिल्भेनियाको योर्कमा १९७३ मा हराएकी किशोरीको अवशेष वंशावली अनुसन्धान र डीएनए विश्लेषण मार्फत पहिचान गरिएको अधिकारीहरुले बताएका छन् ।
पेन्सिल्भेनिया राज्य प्रहरीका अनुसार दुई खेल वार्डनले अक्टोबर १०, १९७३ मा युनियन टाउनशिपको एउटा जंगलमा प्लाष्टिकको टार्ट र ब्रसमुनि कुहिएको अवशेष फेला पारेका थिए । त्यतिबेला अन्वेषकहरूले तिनीहरूलाई पहिचान गर्न सकेनन् । तर लामो खैरो वा गोरो कपाल भएको सेतो महिलाको रूपमा वर्णन गरेका थिए । उनको मृत्युको तरिका निश्चित गर्न सकिएको थिएन ।
आधा शताब्दी पछि अन्वेषकहरूले डीएनए विश्लेषण र जीवित आफन्तहरूसँग अन्तर्वार्ता प्रयोग गरेर योर्ककी १४ वर्षीया रूथ एलिजाबेथ ब्रेनम्यानको अवशेषहरू पत्ता लगाएका हुन् । उनी सन् १९७३ को स्कूल वर्षको सुरुदेखि बेपत्ता थिइन् ।
विगत ५१ वर्षदेखि अलमलिएका प्रश्नहरूमा केही जवाफ प्रदान भएको रुथको परिवारले बिहीबार बताएका थिए । यो मुद्दा सन् २०१६ सम्म निस्कृय जस्तै थियो । पुलिसले उनको डीएनए प्राप्त गर्न लेबनान, पेन्सिलभियानाको एउटा चिहानको दुर्गम कुनाबाट अवशेष निकालेका थिए ।
रूथलाई चिन्न वर्षौंको असफल प्रयास पछि त्यसो गरिएको थियो । साथै केटी कस्तो देखिन सक्छिन् भनेर दुईवटा मूर्तिहरू विकास गरिएको थियो।
अवशेषहरूलाई क्षेत्रीय अस्पतालमा लगेर जाँच गरिएको थियो । तर वर्षौंसम्म पनि वंशावली पत्ता लगाउन सकिएको थिएन । अनुसन्धानकर्ताहरूले गत महिना रूथको अवशेषको रूपमा पहिचान गरेको प्रहरीले बताएको छ ।
रुथ नोभेम्बर २६, १९५८ मा जन्मेकी थिइन् । उनी स्कूल जान घरबाट निस्केपछि कहिल्यै घर फर्किनन्। केही महिना पछि उनको अवशेष उनको गृहनगरबाट ५० माईल उत्तरमा फेला परेको थियो । रूथलाई मृत घोषणा गर्ने कुनै रेकर्ड थिएन । प्रहरीका अनुसार उनी हराएको रिपोर्ट गरिएको थियो कि थिएन भन्ने पनि स्पष्ट छैन।
वंशावली अनुसन्धान प्रक्रियाको एक भागको रूपमा अन्वेषकहरूले परिवारका सदस्यहरूसँग अन्तर्वार्ता लिएका थिए । साथै पुराना समाचार लेखहरू र अदालतका कागजातहरू हेरेका थिए।
आनुवंशिक वंशावलीमार्फत अनुसन्धानकर्ताहरुलाई दशकौं अघि भेटिएका अज्ञात व्यक्तिहरूको अवशेषहरू पहिचान गर्न मद्दत गरिरहेको छ । त्यस समयमा वंशावली प्रायः प्रारम्भिक चरणमा थियो । तर यो प्रविधिको विकाशले अनुसन्धानमा सहज बनाएको छ ।
किशोरीको मृत्यु कसरी भयो भन्ने अझै खुल्न सकेको छैन । पेन्सिलभेनिया राज्य प्रहरीले रुथको मृत्युको अनुसन्धान जारी राखेको छ । यो हत्या हो कि होइन भन्ने कुरा अझै पनि निर्धारण गरेको छैन । यस केसको बारेमा जानकारी दिनेलाई ५ हजार डलर पुरस्कारको प्रस्ताव गरिएको छ ।