यी ७ ब्याटलग्राउण्ड राज्यमा अमेरिकी राष्ट्रपति चुनावको नतिजा कहिले आउँछ?
प्रकाशित मिति : कार्तिक २०, २०८१ मंगलबार
राष्ट्रपति चुनावका कारण अहिले विश्व समुदायको ध्यान अमेरिकातिर रहेको छ भने अमेरिकनहरुको ध्यान ७ वटा ब्याटलग्राउण्ड राज्यतिर रहेको छ । तर चुनावको अन्तिम परिणाम चुनावकै रातमा नआउनपनि सक्छ । मतगणना मङ्गलबारको चुनावी रातभन्दा ढिलोसम्म हुनेछ भने झिनो मतान्तर भएमा मंगलबार राती नै नतिजा निर्धारण नहुन पनि सक्छ ।
सर्वेक्षणहरुमा देखिएजस्तो कडा प्रतिपस्पर्धा भएको खण्डमा विजेताको प्रक्षेपण गर्न केही दिन लाग्न पनि सक्छ । २०२० को राष्ट्रपति चुनावमा महामारीको कारण हुलाकमार्फत मतपत्र पठाएर मतदान गर्नेहरुको संख्या निकै ठूलो रहेको थियो । धेरै राज्यहरूले पहिलो पटक ठूलो संख्यामा हुलाकमार्फत प्राप्त मतपत्रहरू गणना गरेका थिए । त्यसपछि कैयन राज्यहरुले गणनालाई गति दिन परिवर्तनहरू गरेपनि हुलाकमार्फत प्राप्त मतपत्रहरू गणना गर्न अहिलेपनि धेरै समय लाग्ने देखिन्छ ।
ब्याटलग्राउण्ड राज्य जर्जियामा मतदान ७ बजे समाप्त हुन्छ। यहाँ धेरै मानिसहरूले अग्रिम मतदान गर्छन् भने हुलाकमार्फत मतपत्र पठाएर मतदान गर्ने संख्या कम छ । जसका कारण यहाँ गणनालाई छिटो बनाउँछ। हुलाकमार्फत मतपत्र पठाएर मतदान गर्नेहरुको संख्या औषतमा ६ प्रतिशत रहेपनि २०२० मा भने २५ प्रतिशत भएको थियो । तर विदेशबाट आएका, प्रोभिजनल र सच्याइएका मतपत्रहरू गणना गर्न भने केही दिन लाग्ने देखिन्छ ।
नर्थ क्यारोलिनामा मतदान साढे ७ बजे समाप्त हुन्छ। यहाँ पनि अग्रिम मतदान निकै लोकप्रिय छ । सामान्यतया ९८ प्रतिशत भन्दा बढी मत मध्यरातसम्म गनेर सकिन्छ। किनभने पछिल्ला २ वटा मुख्य चुनावमा मध्यरातसम्म ९८ देखि ९९ प्रतिशत मतगणना गरिएको थियो ।
पेन्सिल्भेनियामा मतदान ८ बजे समाप्त भएपनि मत गणना गर्न धेरै समय लाग्छ । किनभने चुनावको दिनसम्म हुलाकबाट प्राप्त भएका मतपत्रहरू प्रशोधन गर्न अनुमति छैन। गणनाले २०२० देखि २०२२ सम्म उल्लेखनीय रूपमा गति लिएको छ । नयाँ, छिटो उपकरण र आवश्यकताको कारणले गर्दा अधिकांश काउन्टीहरूले मतदान बन्द भएपछि रातभरि हुलाकबाट प्राप्त मतपत्रहरूको गणना जारी राख्छन् ।
मिशिगनमा मतदान ८ बजे र ९ बजे समाप्त हुन्छ। विगतका दुई आम निर्वाचनहरूमा मिशिगनमा करिब आधा मतहरू मध्यरातसम्म गणना गरिएको थियो । बाँकी मतहरूको ठूलो भाग अर्को दिन दिउँसोसम्म गणना गरिएको थियो। तर राज्यले ठूला सुधारहरू पारित गरेको छ जसले गणनालाई गति दिन सक्छ । अग्रिम मतदानका लागि ९ दिनको अवधि दिनुका साथै काउन्टीहरूलाई चुनावको दिनभन्दा अघि नै हुलाकबाट प्राप्त मतपत्रहरू प्रशोधन सुरु गर्न अनुमति दिइएकाले गणना छिटो हुनसक्छ ।
विस्कन्सिनमा मतदान ९ बजे समाप्त हुन्छ। मतगणना रातभर चल्छ भने अधिकांश नतिजा बुधबार बिहानसम्म आउने अपेक्षा गरिएको छ । त्यस्तै एरिजोनामा मतदान ९ बजे समाप्त हुन्छ। पहिलो नजिता राती १० बजेसम्म नै आउँछ । तर यहाँ हुलाकमार्फत आएका मतपत्रहरू अधिक हुन्छन् र गणनाका लागि केहीसमय लाग्नसक्छ । हुलाकमार्फत प्राप्त मतपत्रहरु चुनावको दिनभन्दा अगाडि नै प्रशोधन गर्न पाइने प्रावधान छ ।
त्यस्तै नेभाडामा मतदान १० बजे समाप्त हुन्छ। यहाँ पनि प्रायः आधा मतदाताले हुलाकमार्फत मतदान गर्छन्। त्यसैले गणनामा लामो समय लाग्छ । नयाँ प्रविधि र अधिकारीहरूले छिट्टै मतपत्रहरू तालिकाबद्ध गर्न सक्ने नियमका कारण मतगणना विगतको तुलनामा छिटो हुन सक्छ। तर पोष्टमार्क गरिएका मतपत्रहरू निर्वाचनको चार दिनपछि नोभेम्बर ९ मा आइपुग्न अनुमति दिइने भएकाले र मतदाताहरूले आफ्नो मतपत्रमा भएका गल्तीहरूलाई सम्बोधन गर्न नोभेम्बर १२ सम्मको समय दिइने भएकाले गणनामा लामो समय लाग्छ ।