कुम्भकर्ण हिमाल आरोहणको क्रममा अमेरिकी आरोही माइकल गार्डनरको निधन
प्रकाशित मिति : आश्विन २३, २०८१ बुधबार
नेपालको कुम्भकर्ण हिमाल आरोहणको क्रममा अमेरिकी स्की अल्पिनिस्ट ३३ बर्षीय माइकल गार्डनरको निधन भएको छ । ७ हजार ७ सय १० मिटर उचाईको कुम्भकर्ण हिमाल आरोहणका क्रममा गार्डनरको निधन भएको हो ।
जिल्ला प्रहरी कार्यालय ताप्लेजुङका प्रहरी निरीक्षक एवं सूचना अधिकारी विवेक बस्नेतले गार्डनर बेपत्ता भएको पुष्टी गरेका छन् । प्रहरीका अनुशार ग्राण्ड हिमालय ट्रेक्स एण्ड एक्सपीडिसन प्रालिमार्फत् गार्डनर हिमाल आरोहणका लागि आएका थिए । यो हिमाल फक्ताङलुङ गाउँपालिका ६ मा पर्छ ।
अक्टोबर ६ घुन्सामा बसेर उनी बेसक्याम्प तर्फ गएका थिए । अक्टोबर ९ मा हिमाल आरोहणका क्रममा हावाको बेगले हानेर उनी बेपत्ता भएको र खोजिका लागि घुन्साबाट प्रहरी समेत परिचालन गरिएको बस्नेतले जानकारी दिएका छन् । उनको शव अहिलेसम्म फेला परेको छैन ।
माइक गार्डनर अमेरिकाको आइदायो निवासी दोस्रो पीढीका पर्वतारोही हुन् । उनले आफूलाई आरोही र स्की गर्ने व्यक्तिका रुपमा चिनाउदै आएपनि सबैभन्दा बढी स्केटबोर्डरको रूपमा वर्णन गर्दै आएका थिए ।
विश्वव्यापी डिजाइन कम्पनी आर्कटेरिक्सले गार्डनरको निधन भएको बताएको छ । कम्पनीले आफ्नो इन्स्टाग्राम पोष्टमा माइकल गार्डनरको यस हप्ताको सुरुमा नेपालको कुम्भकर्ण हिमाल आरोहण गर्ने क्रममा निधन भएको उल्लेख गर्दै दुःख व्यक्त गरेको छ । माइक हिमालमा आफ्ना लामो समयदेखिका साझेदार साम हेनेसीसँग रहेको र हेनेसी भने सुरक्षित भएको कम्पनीले जनाएको छ ।
कोलोराडोको रिजवेमा जन्मेका उनले आफ्नो बाल्यकाल आफ्नो बुबालाई टेटोन्सबाट नेपालसमम पछ्याउँदै बिताएको र उनले १६ वर्षको हुँदा आरोहण दुर्घटनामा आफ्नो बुबा गुमाएको आर्कटेरिक्सले जनाएको छ ।