शियाटलबाट उडेको टर्किश एयरलाइन्सको विमानका पाइलटको मृत्यु, न्युयोर्कमा आपतकालीन अवतरण
प्रकाशित मिति : आश्विन २३, २०८१ बुधबार
अमेरिकाको शियाटलबाट इस्तानबुल जाँदै गरेको टर्किश एयरलाइन्सको विमान न्युयोर्कमा आपतकालीन अवतरण गरेको छ । पाइलटको मृत्यु पछि बुधबार उक्त विमानको आपतकालिन अवतरण गरिएको उक्त एयरलाइन्सका प्रवक्ताले बताएका छन् ।
५९ वर्षका पाइलट लेहिन पेह्लिभान विमान सियाटलबाट मंगलबार राति उडेको केही समयपछि बेहोस भएका थिए । त्यसपछि टीके २०४ विमान न्युयोर्कमा अवतरण गर्नुपरेको थियो ।
पाइलटको मृत्युपछि चालक दलका सदस्यहरूले आपतकालीन अवतरण गर्ने निर्णय गरेका थिए । पाइलटलाई पुनर्जीवित गर्ने प्रयास गरेपछि विमान अवतरण गर्नु अघि नै उनको मृत्यु भएको थियो ।
एयरबस ए ३५० विमान जोन एफ केनेडी अन्तर्राष्ट्रिय विमानस्थलमा बिहान ६ बजे अघि अवतरण भएको थियो। यात्रुलाई न्युयोर्कबाट आफ्नो गन्तव्यमा पुर्याउनको लागि व्यवस्था भइरहेको एयरलाइन्सका प्रवक्ताले बताएका छन् ।
पाइलट पेह्लिभान २००७ देखि टर्किश एयरलाइन्समा काम गर्दै आएका थिए । मार्चमा गरिएको नियमित स्वास्थ्य परीक्षणले उनलाई काम गर्न रोक्ने कुनै स्वास्थ्य समस्या देखिएको थिएन ।
टर्किश एयरलाइन्सको तर्फबाट क्याप्टेनको मृत्युप्रति गहिरो दुःख व्यक्त गरिएको छ । साथै उनको शोकाकुल परिवार, सहकर्मीहरू र सबै प्रियजनप्रति समवेदना व्यक्त गरिएको छ ।