सेप्टेम्बर ४ मा ह्यारिसँग बहसमा आउन ट्रम्प सहमत, बहस फक्स न्युजले संचालन गर्ने
प्रकाशित मिति : श्रावण १९, २०८१ शनिबार
अमेरिकी राष्ट्रपति पदका लागि रिपब्लिकन उम्मेदवार डोनाल्ड ट्रम्पले सेप्टेम्बर ४ मा फक्स न्युजमा अमेरिकी उपराष्ट्रपतिमा डेमोक्र्याटिक उम्मेदबार कमला ह्यारिससँग बहसका लागि तयार रहेको बताएका छन् । नियमहरू जो बाइडेनसँगको डिबेटका जस्तै हुने ट्रम्पले बताएका छन् ।
ह्यारिसको अभियानले यसबारेमा कुनै टिप्पणी गरेको छैन। फक्स न्यूजले पनि यसबारे कुनै तुरून्त टिप्पणी गरेको छैन । ट्रम्पले पेन्सिल्भेनियामा बिहस हुने बताएपनि कार्यक्रमको स्थान अझै तय भइसकेको छैन।
पहिले नै निर्धारित एबीसी न्यूजको बहस बाइडेनले चुनावी अभियान छाड्नु अगाडि नै रद्द गरिएको थियो । एबीसी न्यूज नेटवर्क र यसका कार्यक्रम संचालक जर्ज स्टेफानोपोलोस विरुद्ध ट्रम्पको मुद्दाका कारण यो बहस रद्द भएको थियो ।
ट्रम्पको कथन डेमोक्र्याटिक नेशनल कमिटीले शुक्रबार एक विज्ञापन अभियान सुरु गरेपछि आएको हो । जसमा अपराधमा दोषी ठहर भएका व्यक्ति बहस गर्न डराउने भन्दै ट्रम्पलाई गर्भपतनमा उनको अडानको कारणले डराएको हो कि भनेर प्रश्न गरिएको छ ।
बाइडेन जुलाई २१ मा चुनावी दौडबाट बाहिरिएपछि र ह्यारिसलाई समर्थन गरेपछि ट्रम्पले ह्यारिस आधिकारिक उम्मेद्वार नभएको भन्दै उनीसँग बहस नगर्ने बताएका थिए । शुक्रबार ह्यारिसले डेमोक्रेटिक उम्मेदवारी प्राप्त गर्न आवश्यक डेलिगेटका मतहरू सुरक्षित गरिसकेकी छिन् ।
फक्स न्यूजले सेप्टेम्बर १७ मा दुई उम्मेद्वारहरूबीचको राष्ट्रपतिको बहसको प्रस्ताव गरेपछि ह्यारिसले गत महिना आफू तयार भएको प्रतिक्रिया दिएकी थिइन्।
बहसका मध्यस्थकर्ताहरू फक्स न्यूजका कार्यक्रम संचालकहरु ब्रेट बेयर र मार्था म्याकलम हुनेछन्।