श्रीमानले छोडेकी निग्मालाई बाढीले बनायो बिचल्ली
प्रकाशित मिति : श्रावण १९, २०८१ शनिबार
कास्कीको लेखनाथकी २७ वर्षीया निग्मा शेर्पा वर्षौंदेखि बस्दै आएको घर सेतीमा आएको बाढीले बगाइदिएको छ । घर बगेपछि डेढ वर्षीया छोरी काखमा च्याप्दै, नदी किनारको चौरमा त्रिपालभित्र बिहानको खाना पकाउँदै हुनुहुन्थ्यो ।
उहाँको एकमात्र साहारा ३१ वर्षीय श्रीमान् प्रेम शेर्पा दुई वर्षदेखि बेखबर हुनुहुन्छ । छोरी पेटमै हुँदा रोजगारीका लागि साउदी अरब जानुभएको हो । तर गएकै समयदेखि फोन सम्पर्क छैन ।
विदेशमा अर्की श्रीमती लिएर बसेको खबर पाएको निग्मा बताउनुहुन्छ । मजदुरी गरेर छोरी पाल्दै आएकी थिएँ, भएको एउटा बास पनि सेतीको बाढीले बगाइदियो, भाग्यले बाच्यौं, अब छोरीबाहेक मेरो कोही रहेन निग्माले दुखेसो पोख्नुभयो ।
प्रेमसँग प्रेम विवाह गर्नुभएकी निग्माले भन्नुभयो, “विवाह गर्दा सुखसँग बाँच्ने सपना देखेकी थिएँ । तर विवाह गरेको दुई तीन वर्षमै यस्तो दुःख भोग्नुप¥यो । धादिङबाट पोखरा आएर बस्नुभएकी निग्माको प्रेमसँग पोखरामा भेट भएपछि दुवैबीच प्रेम विवाह भएको थियो ।
निग्माको मात्र हैन यहाँका ३८ परिवारको दुःख उस्तै छ । गस्ती टोलकै २९ वर्षीया यमकुमारी मगरको पीडा पनि कम्ता छैन ।
सेती नदीको बाढी घरमै आउन थालेपछि लत्ताकपडा र भाँडाकुँडा लिएर भाग्दै सुरक्षित ठाउँमा आएको पाँच जनाको परिवार पनि त्रिपालमुनि बस्दै आएको छ । मजदुरी गरेर खाने यो परिवारलाई बिहानबेलुकाको छाक टार्नै मुस्किल छ ।
सेती नदीमा गत असार २२ गते आएको बाढीले पोखरा–१४ स्थित गस्ती टोलका निग्मासहित ३९ परिवारको घर बगाइदिएको छ । ती परिवारको २५ दिनदेखि त्रिपालमुनिको बास छ । तीमध्ये केही परिवार आफन्तकहाँ बस्दै आएका छन् ।