टी–२० विश्वकप क्रिकेट : भारत , दक्षिण अफ्रिका र अष्ट्रेलिया सुपर ८ मा पुगे
प्रकाशित मिति : जेष्ठ ३०, २०८१ बुधबार
आईसीसी टी–२० विश्वकपको सुपर ८ मा भारत प्रबेस गरेको छ । भारतले तेस्रो खेलमा जित हासिल गरेसंगै सुपर ८ मा प्रबेश गर्ने तेश्रो टोली बनेको हो । यसअघि दक्षिण अफ्रिका र अष्ट्रेलिया सुपर ८ मा पुगिसकेका छन ।
बुधबार राति भएको खेलमा अमेरिकालाई ७ विकेटले हराएर भारतले लगातार तेस्रो जित निकालेको हो ।
यसअघि भारतले पाकिस्तान र आयरल्याण्डलाई पराजित गरेको थियो । अमेरिकाले दिएको १ सय ११ रनको लक्ष्य भारतले १८ ओभर २ बलमा ३ विकेटको क्षतिमा भेट्टायो ।
भारतका लागि सूर्यकुमार यादवले अविजित ५० रन बनाए । अमेरिकाका सौरभ नेत्रभल्करले २ विकेट लिए । यसअघि पहिले ब्याटिङ गरेको अमेरिकाले निर्धारित २० ओभरमा ८ विकेटको क्षतिमा १ सय १० रन बनाएको थियो । उसका लागि नितिश कुमारले सर्वाधिक २७ रन बनाए ।
भारतका अर्शदीप सिंहले ४ विकेट लिए । समूह ए मा ३ खेलबाट ६ अङ्क बटुल्दै भारत सुपर ८ मा प्रवेश गरेको छ । अमेरिका ४ अङ्कसहित दोस्रो स्थानमा छ ।